Tá baile gnóthach i nDún na nGall chun tosaigh ag an bomaite seo le teachtaireacht dhearfach don Ghaeilge a chur chun cinn sna siopaí, dar leis an Donegal News.
Reáchtálann Sharon agus Brendan McGlynn caife móréilimh ar an mbaile ach nuair a d’athraigh siad an t-ainm ó The Quiet Moment go An Bomaite Ciúin, fuair siad freagra mór dearfach.
Anois tá siad ag spreagadh gnólachtaí eile sa bhaile le bheith páirteach agus a gcuid ‘cúpla focal’ a úsáid freisin.
An rud a thaitin le daoine áitiúla faoin ainm nua atá ar an gcaifé ar Phríomhshráid Leitir Ceanainn (Letterkenny) ná úsáid an fhocail ‘bomaite’, leagan uathúil (unique) Dhún na nGall den fhocal ‘nóiméad’, agus leagan i bhfad níos áille freisin.
Dúirt Sharon gur smaoinigh siad ar roghanna éagsúla do chomharthaíocht ‘An Bomaite Ciúin’, ach shocraigh siad go raibh sé ceart dul le Gaeilge Dhún na nGall mar go bhfuil siad bródúil as a bheith mar chuid do mhuintir Dhún na nGall.
SCÉAL EILE: Tá gnólachtaí ag borradh leis an nGaeilge i láthair na huaire
Ón uair a nocht siad a gcomhartha siopa nua ar An Bomaite Ciúin tá freagra thar a bheith dearfach faighte acu ó chustaiméirí agus ó dhaoine a bhíonn ag taisteal thart.
‘Tá sé iontach nuair a dhéanann tú rud éigin agus nuair a thugann daoine faoi deara é. Glacadh go mór leis agus tá sé deacair an fhreagairt ar líne a chreidiúint,’ a dúirt Sharon.
Tá An Bomaite Ciúin ag moladh go láidir do ghnólachtaí eile an rud céanna a dhéanamh agus athrú a dhéanamh, fiú mura bhfuil ach rud beag i gceist.
SCÉAL EILE: How bad IS your Gaeilge?
‘Ba bhreá linn go léir a bheith in ann beagán níos mó Gaeilge a labhairt, fiú go comhráite, mar táimid chomh bródúil as ár dteanga,’ a dúirt Sharon.
‘Ní féidir linn athrú mór a dhéanamh in aon chéim amháin, ní mór dúinn céimeanna beaga a ghlacadh, agus b’fhéidir go spreagfadh an t-athrú beag sin dúinn daoine eile freisin,’ a dúirt sí.
Ní fios ar tháinig an inspioráid ó An Cailín Ciúin ach mhol Sharon Bairbre Uí Chathail ó Líonra Leitir Ceanainn as an obair chrua a rinne sí chun an teanga a dhéanamh níos inrochtana do chách.
Dúirt Bairbre Uí Chathail le Donegal News: ‘Léiríonn an taighde go bhfuil ríméad ar dhaoine nuair a fheiceann siad an teanga Ghaeilge cibé an bhfuil sé ar chomharthaíocht, ar bhiachlár nó an bhfuil an comhlacht in ann seirbhís trí Ghaeilge a chur ar fáil.
‘I dtéarmaí gnó a threisiú (boosting) is fiú go mór é a dhéanamh,’ a dúirt sí.
Dúirt Bairbre freisin go bhfuil éileamh mór anois ar thacaíocht agus ar mhaoiniú ó Scéim Tacaíochta Gnó de chuid Foras na Gaeilge, agus go bhfuil siad ag súil le maoiniú breise sna seachtainí amach romhainn.
Ba cheart do ghnólachtaí ar spéis leo dul go dtí Líonra Leitir Ceanainn.
Bhain go leor gnólachtaí áitiúla leas as an scéim, ina measc Sanjay Mehan ó Bliss ar Phríomhshráid Leitir Ceanainn. Fuair Sanjay málaí nua dá siopa éadaí le cabhair ó Scéim Tacaíochta Gnó Fhoras na Gaeilge.
I measc na n-úinéirí gnó áitiúla eile a bhain leas as an Scéim Tacaíochta Gnó tá Clare McNickel ó Clare Clothing a fuair comharthaí Gaeilge nua agus The Himalayan Café ar Lána an Teampaill atá ag cruthú biachláir dhátheangacha.
Má tá suim agat tuilleadh a fhoghlaim déan teagmháil le Bairbre Uí Chathail ar 086 0751663 nó 074 9127479.
Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
Más mian leat ríomhphost (email) a fháil leis na scéalta is fearr ar Extra.ie, ó Luan go hAoine, seol an focal ‘Tá’ chuig joeextragdotie@gmail.com
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
