Ard-Fheis na nÓg: Bhí plé ar na dúshláin a bhaineann le hintleacht shaorga

Phléigh Gaeilgeoirí óga ceisteanna móra a bheidh rompu , ag Ard-Fheis na nÓg i bPort Láirge an deireadh seachtaine seo caite.

Dhá ábhar a pléadh ná an Intleacht Shaorga agus na pleananna do níos mó poist Ghaeilge faoi 2030, ag Ard-Fheis.

Bhí sé ar siúl ón 21-23 Aibreán i nGaeltacht na nDéise, Co. Phort Láirge, ag tabhairt le chéile breis is 100 dalta ó 12 scoil ar fud na tíre chun páirt a ghlacadh i ndíospóireachtaí bríomhara agus imeachtaí cultúrtha.

Bhí an oscailt oifigiúil ar siúl tráthnóna Dé Máirt i gColáiste na Rinne, le haoichainteoirí, Máire Seó Breathnach, Oifigeach Gaeilge le Comhairle Cathrach agus Contae Phort Láirge, Aoife Ní Chonchúir ó Údarás na Gaeltachta, agus Caibríní de Barra, Bainisteoir Forbartha le Comhlacht Forbartha na nDéise. 

Dé Céadaoin, ghlac daltaí páirt i réimse ceardlann, ina measc seisiúin ar chearta teanga agus na meáin shóisialta, chomh maith le siúlóid dúlra timpeall na nDéise.

Bhí céilí an oíche sin, le ceol ó dhaltaí áitiúla ag tabhairt na scoláirí le chéile chun a dteanga agus a gcultúr a cheiliúradh.

Thar na trí lá, thug na daltaí cur i láthair ar phríomhthéamaí Ard-Fheis na bliana seo – Cúrsaí Intleachta Saorga : Deiseanna agus Dúshláin nó Spriocanna Earcaíochta Sheirbhísí Poiblí Gaeilge faoin mbliain 2030.

Bhí cuir i láthair cruthaitheacha, físeáin agus amhráin i measc na mbealaí ar chuir siad a gcuid smaointe in iúl. 

Bhí deis ag na daltaí vótáil ar son nó i gcoinne na rúin a cuireadh i láthair agus cuirfear na rúin a ritheadh le linn na hócáide faoi bhráid Choiste Gnó Chonradh na Gaeilge anois. 

I measc na mór-rún a ritheadh ag Ard-Fheis na nÓg bhí: 

• ‘Molann Ard-Fheis na nÓg seo nach leor é Plean Gníomhaíochta an Rialtais don Ghaeilge, agus gur chóir dó díriú ar an teanga a chur chun cinn go héifeachtach don ghnáth-theanga labhartha, laethúil agus ní hamháin don earnáil phoiblí’;
• ‘Molann Ard-Fheis na nÓg seo gur athraigh Intleacht Shaorga cúrsaí foghlama amach is amach ó tháinig sí isteach’;
• ‘Molann Ard-Fheis na nÓg seo go bhfuil níos mó mí-buntáistí ná buntáistí bainteacht le hIntleacht Shaorga’.

Bronnadh trí ghradam ar an Déardaoin mar aitheantas ar ardchaighdeán na gcur i láthair:

• Úsáid is Fearr Teicneolaíochta: Gaelcholáiste na Mara, Cill Mhantáin;
• Scileanna Taighde is Fearr: Coláiste Íosagáin, Baile Átha Cliath;
• Taispeántas is Cruthaithí: Coláiste Cois Life, Baile Átha Cliath.

Bhí plé painéil Gairmeacha le Gaeilge ar siúl freisin ar an Déardaoin  ina raibh Mollaí Nic Eochaidh mar bhean an tí, Caibríní de Barra, Laoise Keevers, Oifigeach Forbartha Gaeilge leis an tionscnamh Barr na gCnoc, agus an craoltóir Joe McGee, a roinn léargais ar an raon leathan deiseanna gairmiúla atá ar fáil trí Ghaeilge. 

Scéalta Gaeilge ExtraG.ie
ar fáil ar ríomhphost (email)

• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com

• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.

• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie

Cliceáil ar cheann de na lógónna chun an stáisiún teilifíse agus na stáisiúin raidió Gaeilge a fháil