Tá sé molta ag Aire na Gaeltachta gur cheart go ngearrfaí a gcuid íocaíochtaí leasa shóisialaigh ar na círéibeoirí a bhí páirteach san fhoréigean i lár chathair Bhaile Átha Cliath.
Chuir an foréigean a tharla Déardaoin seo caite isteach ar go leor polaiteoirí.
Le linn na n-ionsaithe cuireadh bus, gluaisteáin an Gharda Síochána agus carráistí Luas trí thine.
Tharla na círéibeacha tar éis ionsaí ar leanaí óga agus oibrí creise lasmuigh de scoil i lár na cathrach.
Gortaíodh roinnt Gardaí agus thug círéibigh ruathar ar go leor gnólachtaí lena n-áirítear Arnotts le linn na trioblóide.
Dúirt Aire Gaeltachta Fhine Gael Patrick O’Donovan gur cheart ‘pionós airgid’ a ghearradh orthu siúd a bhí páirteach sna círéibeacha agus go gcuirfí stop lena n-íocaíochtaí leasa shóisialaigh.
Ag labhairt dó ag cruinniú páirtí parlaiminte an pháirtí cheistigh sé cé mhéad duine a bhí páirteach san fhoréigean sin a bhfuil ag obair faoi láthair.
Mar an gcéanna, d’éiligh na hAirí Stáit Neale Richmond agus Jennifer O’Carroll McNeill go gcuirfí bearta ‘pionósacha cuí’ i bhfeidhm, de réir tuarascála san Irish Independent.
Dúirt Joe O’Reilly, TD de chuid Fhine Gael, gur cheart na Cúirteanna Coiriúla Speisialta a úsáid chun na círéibeacha a thabhairt chun trialach as a gcuid gníomhartha.
Dúirt an Taoiseach leis an Dáil gur chuala sé faoin ionsaí ar an bhean agus roinnt leanaí scoile ag lón a d’óstáil Cumann Tráchtála na Stát Aontaithe Déardaoin seo caite.
‘Bhí imní orm go mbeadh trioblóid mhór ann – agus bhí mé i dteagmháil leis an Aire Dlí agus Cirt,’ a dúirt an tUasal Varadkar.
Idir an dá linn, tá sé ráite ag an Aire Dlí agus Cirt Helen McEntee go mbeidh láithreacht ‘láidir agus sofheicthe’ Gardaí i mBaile Átha Cliath thar thréimhse na Nollag.
• Más mian leat ríomhphost (email) a fháil leis na scéalta is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
