Tá feachtas tiomsaithe airgid 2026 seolta ag Movember, agus táthar ag tathant ar dhaoine ar fud na hÉireann cumhacht an chairdis a chur i ngníomh ar mhaithe le sláinte na bhfear.

Léiríonn taighde nua a thábhachtaí atá cairdeas idir fir agus an brú a mhothaíonn go leor fear fós go gcaithfidh siad déileáil le deacrachtaí ina n-aonar.

Spreagann an feachtas, dar teideal Make a Growmitment, cairde teacht le chéile chun féasóg a fhás, tabhairt faoi ghníomhaíocht choirp, imeacht a eagrú nó dúshlán a ghlacadh chucu féin chun airgead a thiomsú agus feasacht a ardú faoi shláinte na bhfear.

Tá an feachtas á sheoladh i gcomhthéacs imníoch, agus fir in Éirinn ag fáil bháis, ar an meán, 3.7 bliain níos luaithe ná mná. Is iomaí duine acu a fhaigheann bás de bharr cúiseanna inchoiscthe.

Tugann taighde nua a rinneadh thar ceann Movember le fios, cé go bhfuil ról suntasach ag an gcairdeas i saol na bhfear, gur féidir le hionchais thraidisiúnta agus le coincheapa traidisiúnta den fhireannacht é a dhéanamh deacair fós do roinnt fear cabhair a iarraidh.

Dúirt breis agus leath de na fir in Éirinn a ghlac páirt sa suirbhé (52%) go raibh cairdeas idir fir an-tábhachtach nó riachtanach dá bhfolláine. Dúirt 37% go raibh grúpa cairde acu a raibh siad an-dlúth leo, agus d’aithin 28% duine amháin mar a gcara is fearr.

Mar sin féin, creideann níos mó ná fear amháin as gach ceathrar (28%) go bhfuiltear fós ag súil leis go rachaidh fir i ngleic le deacrachtaí gan tacaíocht a iarraidh.

Ina ainneoin sin, dúirt 69% go raibh siad ar a gcompord ag tacú le cara a bhí ag streachailt. Tugann sé sin le fios go bhféadfadh cairdeas a bheith ina bhealach tábhachtach chun comhráite níos oscailte a spreagadh faoi mheabhairshláinte agus folláine.

Léiríonn na torthaí freisin gur minic a chuireann fir a gcúram agus a gean in iúl trí ghníomhartha laethúla seachas trína gcuid mothúchán a chur in iúl go díreach. Luaigh 30% am a chaitheamh le chéile mar bhealach chun a thaispeáint go raibh siad buartha faoina gcairde, agus dúirt 28% go ndéanann siad teagmháil leo ar an bhfón nó trí theachtaireacht téacs chun a fháil amach conas atá ag éirí leo. Dúirt 21% eile go mbíonn siad ag magadh faoina chéile mar bhealach chun cairdeas a chur in iúl.

Ní dúirt ach 11% go dtabharfaidís barróg do chara, agus d’admhaigh 17% go bhféadfadh sé a bheith ciotach dóibh gean a léiriú go hoscailte idir cairde fireanna.

Tugann taighde Movember le fios freisin nach bhfuil aon áit ná cur chuige ar leith riachtanach chun comhrá fiúntach a thosú. Ba é an teach tábhairne an áit ba mhinice a luadh mar áit a dtagann fir le chéile chun caidreamh a chothú, ag 32%, agus siúlóidí (22%), glaonna gutháin (20%) agus caife (17%) ina ndiaidh.

Is féidir le gothaí beaga coitianta difríocht a dhéanamh freisin. D’aithin 38% an cheist ‘Aon scéal nua?’ mar bhealach chun cúram a léiriú, agus luaigh 25% an tairiscint shimplí ‘cuirfidh mé an citeal ar siúl’.

Bíonn éagsúlacht ann freisin idir na glúnta sa teanga a úsáideann fir chun cur síos a dhéanamh ar a gcairdis. Ba é ‘na leaids’ an téarma ba choitianta ar an iomlán, agus 32% d’fhir na hÉireann á úsáid, agus ba é ‘na buachaillí’ an téarma ab ansa le fir idir 18 agus 34 bliain d’aois, ag 30%.

Trí fheachtas Make a Growmitment, tá súil ag Movember cur leis na naisc laethúla seo agus daoine a spreagadh chun an t-am a chaitheann siad lena gcairde a iompú ina rud a d’fhéadfadh difríocht shuntasach a dhéanamh do shláinte na bhfear.

Cibé acu trí fhéasóg a fhás, imeacht sóisialta a eagrú, tabhairt faoi dhúshlán aclaíochta nó teagmháil a dhéanamh le cara chun a fháil amach conas atá ag éirí leis, is é aidhm an fheachtais a chinntiú gur iarracht chomhroinnte í tacú le sláinte na bhfear.