Tá na príomhpháirtithe Rialtais curtha faoi bhrú ag chuid de na Teachtaí Dála tuaithe neamhspleácha, a deir go rachaidh siad i rialtas le Sinn Féin, de réir tuairisce san Irish Daily Mail.

Is coimeádach traidisiúnta iad na Teachtaí Dála tuaithe agus bheifí ag súil go mbeidís níos fabhraí d’Fhianna Fáil nó d’Fhine Gael – ach anois tá siad ag rá b’fhéidir nach amhlaidh atá.

Agus má leanann an fhearg atá léirithe ag go leor vótálaithe tuaithe faoin Rialtas, d’fhéadfadh na TDanna neamhspleácha vótaí a ghlacadh ón dá phríomhpháirtí Rialtais – agus a suíocháin a úsáid ansin chun iad a chur amach as an Rialtas.

Ach tá éilimh áirithe orthu. Ina measc tá Roinn Iascaigh ar leith, le haire Comh-Aireachta.

Tá siad ag iarraidh deireadh a chur leis an gcáin charbóin freisin.

Tá sé beartaithe ag Michael Fitzmaurice, TD neamhspleách, páirtí nua a bhunú a bheidh dírithe ar an tuath.

Agus tá na Teachtaí Dála neamhspleácha tuaithe – Mattie McGrath, Michael Collins agus Richard O’Donoghue agus eile – i mbun cainteanna le comhairleoirí freisin chun grúpa tuaithe ar leith a bhunú roimh an gcéad olltoghchán eile.

Agus an Rialtas faoi bhrú roimh na toghcháin áitiúla an bhliain seo chugainn, d’fhéadfadh go mbeadh grúpa láidir agus cumhachtach de chomhairleoirí tuaithe tofa ar fud na tíre agus iad réidh le seasamh san Olltoghchán a thiocfaidh ina dhiaidh sin.

Beidh orthu gníomhú go tapa áfach: beidh na toghcháin áitiúla agus Eorpacha ann i mí na Bealtaine seo chugainn, agus táthar ag súil le holltoghchán i mí na Samhna na bliana seo chugainn.

Dúirt foinse na dTeachtaí Dála Neamhspleácha: ‘Tá deis againn a bheith sa rialtas. Bheimis i rialtas le Sinn Féin, níl aon cheist faoi.

‘Dhéanfaimis gnó le Sinn Féin. Creidimid go bhfuil Éire níos cothroime de dhíth.’