Tá Johnny Fean, an giotáraí le fada an lá le Horslips atá ar shlí na Fírinne. D’fhógair an banna bás Fean ag aois 71, ar a leathanach Facebook tráthnóna Dé hAoine.
‘Tá an-bhrón ar Horslips tar éis bás ball den bhanna Johnny Fean, a fuair bás ar maidin ina theach sa tSionainn, a fhógairt’ a dúirt an banna.
‘Le breis is 50 bliain ba é Johnny an cara is fearr a bhí againn, ár gcomhoibrí cruthaitheach, ár laoch giotáir.
‘Ní hamháin go raibh Johnny ar dhuine de na himreoirí giotáir ab fhearr riamh, bhí sé ar an bhfear is binne sa rac is roll.’
Fágann Fean a bhean chéile Maggie, ina dhiaidh chomh maith lena dheartháireacha Ray, Donal agus Shearie agus a dheirfiúracha Gail agus Corna.
Bunaíodh an rac-bhanna ceoil Ceilteach Horslips i 1970 agus tháinig Fean leo go gairid ina dhiaidh sin.
I measc na n-amhrán is cáiliúla ag an bhanna tá Dearg Doom agus Trouble with a Capital T.
Ina ráiteas scríobh Horslips freisin: ‘Mar gheall ar an tallann iontach a bhí aige, bhí an-chuid lucht tacaíochta ag Fean. Ach is sinne a lucht leanúna is mó i gcónaí.’
Dúirt siad gur chaith Fean ‘a shaol don cheol’ agus go bhfuil an banna ‘buíoch go deo go ndearna sé é sin’.
Chuir Horslips ‘comhbhrón ó chroí’ in iúl dá mhuintir agus dúirt: ‘Tá fíorbhrón orainn.’
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
