Bíonn thart ar 100 leanbh ar liosta cosanta Tusla, sula rugadh iad, gach bliain, de bharr faitíos roimh mhí-úsáid nó faillí (neglect), léiríonn figiúirí a fuair an Irish Daily Mail.
Dúirt Tusla, an gníomhaireacht um chosaint leanaí an Stáit, nach nglacfar le haon chinneadh leanbh a chur ar an liosta ach mar ‘rogha dheireanach’.
Ach chuir an polaiteoir a nocht na figiúirí síos ar an gcás mar rud ‘thar a bheith brónach’ agus tá sé ag éileamh tacaíochtaí do thuismitheoirí a bhfuil fadhbanna andúile, foréigean teaghlaigh agus ‘deacrachtaí giniúna’ acu.
Léiríonn figiúirí a cuireadh ar fáil do cheannaire Aontú, Peadar Tóibín, gur chuir Tusla 726 leanbh gan bhreith ar a Chóras Fógra um Chosaint Leanaí (Child Protection Notification System, CPNS) idir 2014 agus 2021.
Mar fhreagra ar an Uasal Tóibín, dúirt urlabhraí do Tusla gur ‘grúpa leochaileach ar leith’ a bhí sna naíonáin.
‘Ní mór d’aon mheasúnú ar an riosca, machnamh cúramach a dhéanamh ar chumas na ndaoine fásta atá ina saol chun iad a chosaint agus aire a thabhairt dóibh,’ a dúirt an t-urlabhraí.
Dúirt an tUasal Tóibín leis an Irish Daily Mail: ‘Sílim go bhfuil sé thar a bheith brónach go meastar go bhfuil an oiread sin leanaí gan bhreith i mbaol, fiú sula dtagann siad ar an saol.
‘Is é an rud is gá dúinn a dhéanamh ná an tacaíocht riachtanach ar fad a chur i bhfeidhm do thuismitheoirí ionas go dtugtar tacaíocht dóibh chun a gcuid leanaí a thógáil sa chaoi is fearr agus is féidir leo.’
Dúirt an tUasal Tóibín go mbeadh ‘mórdhúshláin’ ag cuid de na tuismitheoirí maidir le halcól agus drugaí, agus go raibh ‘dúshláin ghlúine’ ag go leor acu.
Dúirt sé go raibh fadhbanna le foréigean baile freisin agus go raibh gá le hidirghabhálacha cuí chun mná a chumhachtú le bheith in ann caidreamh dainséarach a fhágáil.
Dúirt urlabhraí de chuid na Roinne Leanaí, sa chás go bhfuil ‘cinneadh déanta ag duine dul ar aghaidh le toircheas (pregnancy)’, agus go bhfuil rioscaí aitheanta a d’fhéadfadh ‘tionchar a bheith acu ar an leanbh tar éis breithe’, go mbíonn ar sheirbhísí cosanta leanaí measúnuithe rioscaí a dhéanamh.
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
