Chaith cáiníocóirí €120 MILLIÚN ar phá i scoileanna príobháideacha

millTá €120 milliún íoctha ag cáiníocóirí chun tacú le tuarastail foirne scoileanna príobháideacha agus anois tá fearg ar Teachtaí Dála an Fhreasúra agus iad ag éileamh deireadh a chur le maoiniú poiblí do na hinstitiúidí eisiacha seo.

Úsáideadh an airgead cáiníocóirí chun íoc as €120 milliún i bpá múinteoirí agus cúntóirí riachtanas speisialta (special needs assistant, SNA) i scoileanna príobháideacha, léiríonn figiúirí na Roinne Oideachais.

Tá éileamh déanta ag Teachtaí Dála ón bhfreasúra go gcuirfí deireadh de réir a chéile le maoiniú poiblí do scoileanna príobháideacha.

Léiríonn figiúirí a eisíodh don Irish Daily Mail gur íoc an Rialtas, le linn na bliana 2020/2021, os cionn €120 milliún le 51 scoil phríobháideach ar thuarastail múinteoirí agus SNA.

As sin, pá comhlán (gross pay) a bhí i €108.36 milliún agus €11.97 milliún mar PRSI fostóra. Den phá comhlán, chuaigh breis is €72 milliún chuig 34 scoil i mBaile Átha Cliath.

Coláiste San Aindrias i mBaile an Bhóthair a fuair an líon ba mhó, le tuarastail do mhúinteoirí agus do chúntóirí riachtanas speisialta (SNA) de bhreis agus €4.46 milliún; b’ionann sin agus €4.3 milliún i dtuarastail mhúinteoirí agus €154,000 i dtuarastail SNA.

Sa dara háit bhí Coláiste Wesley, a fuair €4.29 milliún, fuair Coláiste na Carraige Duibhe (Blackrock College) €4.26 milliún agus fuair Coláiste Belvedere beagnach €4 milliún.

Ba i mBaile Átha Cliath a bhí na ceithre scoil ba mhó le haghaidh íocaíochtaí tuarastail Stáit, agus fuair Coláiste an Droichid Nua i gCill Dara beagnach €3.5 milliún.

Ba iad Coláiste na mBráithre Críostaí i gCorcaigh (€3.46 milliún), An Ardscoil i mBaile Átha Cliath (€3.15 milliún), Coláiste na Toirbhirte i gCorcaigh (€3.14 5 milliún), Ospidéal an Rí i mBaile Átha Cliath (€3.46 milliún), agus Meánscoil Villiers i gcathair Luimnigh (€2.88 milliún), na cinn eile den deichniúr ab fhearr.

Tá alumni suntasacha i gciorcail pholaitiúla ag cuid de na scoileanna seo.

D’fhreastail an Taoiseach Leo Varadkar ar Ospidéal an Rí mar a rinne an tAire Leanaí Roderic O’Gorman. Chuaigh an tAire Fiontar Simon Coveney go Coill Clongowes i gCill Dara, a fuair €1.76 milliún. D’fhreastail Eoin Ó Broin ó Shinn Féin ar Choláiste na Carraige Duibhe agus chuaigh an t-iar-aire oideachais Richard Bruton agus an t-aire sóisearach reatha Jack Chambers araon go Belvedere.

Chuaigh ceannaire Shinn Féin Mary Lou McDonald ar scoil phríobháideach freisin, Notre Dame i mBaile an Teampaill, Baile Átha Cliath, a dúnadh in 2019.

Ag labhairt dó leis an Irish Daily Mail, dúirt urlabhraí oideachais Shinn Féin, Donnchadh Ó Laoghaire: ‘Is í an bhuncheist ná go bhfuilimidne mar dhaoine ag tabhairt fóirdheontais (subsidies) do scoileanna atá ag déanamh leatrom (discriminating) ar bhonn ioncaim agus ciallaíonn sé sin go bhfuil daoine ar ioncam íseal ag íoc as oideachas do leanaí atá i scoileanna faoi phribhléid, atá eisiach (exclusive) sa chaoi a n-admhaíonn siad daoine.

‘I gcás rialtas Shinn Féin ní fhéadfaimis tacú le leanúint ar aghaidh ag cur €120 milliún ar fáil mar fhóirdheontas do na scoileanna seo agus iad ag déanamh leithcheal ar cé a thagann isteach ar bhonn ioncaim.