Póilíní drugaí i Nua-Eabhrac ag fiosrú bás Martha Nolan O’Slatarra, an dearthóra faisin Éireannaigh

Tá fócas an imscrúdaithe ar bhás Martha Nolan O’Slatarra i Nua-Eabhrac dírithe ar a fháil amach cé a sholáthair na drugaí a líomhnaítear a mharaigh í

Tá póilíní drugaí i Nua-Eabhrac anois ag fiosrú bás an dearthóra faisin ó Cheatharlach (Carlow), Martha Nolan O’Slatarra.

Tá an fócas anois dírithe ar a fháil amach cé a sholáthair na drugaí a líomhnaítear a mharaigh an bhean óg.

Fuarthas Ms Nolan O’Slatarra, a bhí 33 bliain d’aois, marbh ar luamh (yacht) príobháideach i gceantar sómasach Montauk sna Hamptons, Nua-Eabhrac, níos luaithe an mhí seo.

Níor cuireadh bás foréigneach as an áireamh i scrúdú tosaigh.

Tá oifigigh drugaí curtha ag póilíní Nua-Eabhrac ar an gcás anois mar is cosúil gur bhásaigh Ms Nolan O’Slatarra de bharr ródháileog (overdose) drugaí.

Tá an t-imscrúdú á stiúradh ag Tascfhórsa Drugaí East End Chontae Suffolk.

Ní bheidh torthaí tocsaineolaíochta ar fáil ar feadh roinnt míonna ach tá na póilíní ‘an-mhuiníneach’ gur bhásaigh sí de bharr ródháileog.

Ní dheimhneodh urlabhraí póilíní an bhfuarthas drugaí nó fearais drugaí ar bord an luamh.

Fógrófar sonraí sochraide Ms Nolan O’Slatarra an tseachtain seo.

Bhí Ms Nolan O’Slatarra i mbun a colscartha ón bhfear gnó Sam Ryan a chur i gcrích tráth a báis.

Dúirt an t-aturnae David Centeno i ráiteas: ‘Rinne mé ionadaíocht ar son an Uasail Ryan.

Bhí na cáipéisí deiridh curtha faoi bhráid na cúirte agus sular eisíodh an breithiúnas colscartha, fuair mé amach faoi bhás Ms Nolan-O’Slatarra agus chuir mé an chúirt ar an eolas láithreach.

‘As meas ar phríobháideacht na ndaoine a bhí páirteach agus ar mo shrianta eiticiúla, ní féidir liom plé a dhéanamh ar cibé an raibh comhaontú réamhphósta, idirghabháil, nó socruithe príobháideacha eile ann.’

Tá Montauk suite i Long Island, Nua-Eabhrac. Lonnaithe sna Hamptons, tá an baile anois ina chlós súgartha samhraidh do na daoine saibhre agus cáiliúla.

Athraíonn go leor bróicéirí milliúnaí Wall Street ann lena dteaghlaigh chun éalú ó theas agus taise Nua-Eabhrac.

Tuairiscíodh roimhe seo gur cúisíodh Ms Nolan-O’Slatarra as goid ó ghnó a raibh sí ag obair leis.

Sa bhliain 2022, rinne bunaitheoir Out East Accessories Inc, atá faoi úinéireacht Jeremy Valeda, cás dlí ina coinne.

Réitíodh an cás cúpla mí tar éis é a chomhdú.

Díreach seachtainí ó shin, cheiliúir Ms Nolan O’Slatarra oscailt mhór siopa sealadach a branda i Montauk.

Ceapadh í ina stiúrthóir oibríochtaí ag K4 Capital Management, gnólacht bainistíochta infheistíochta, i mí an Mheithimh anuraidh freisin.

Scéalta Gaeilge ExtraG.ie
ar fáil ar ríomhphost (email)

• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com

• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.

• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie

Cliceáil ar cheann de na lógónna chun an stáisiún teilifíse agus na stáisiúin raidió Gaeilge a fháil