Tá Mette Frederiksen, Príomh-Aire na Danmhairge, tar éis plean a fhógairt chun rochtain ar na meáin shóisialta a chur faoi chosc do gach páiste faoi bhun 15 bliana d’aois.
Dúirt sí go bhfuil fóin phóca agus ardáin shóisialta ‘ag goid óige ár bpáistí’.
Ag labhairt sa pharlaimint, dúirt Frederiksen go bhfuil an moladh dírithe ar chosaint óige ó imní, dúlagar agus fadhbanna le haird.
Thug sí rabhadh freisin go bhfeiceann páistí ar scáileáin rudaí ‘nach ceart do pháiste ná don aos óg a fheiceáil’.
Faoin bplean, ní bheidh cead ag páistí 13 agus 14 bliana d’aois rochtain a fháil ar na meáin shóisialta ach amháin má thugann a dtuismitheoirí cead dóibh.
Níor luaigh an Príomh-Aire na haipeanna ná na hardáin shonracha a mbeidh tionchar orthu, ach dúirt sí go mbeidh na rialacha i bhfeidhm ar ‘go leor’ líonraí sóisialta.
Tá súil ag Frederiksen go gcuirfear an cosc i bhfeidhm chomh luath le bliain amach romhainn.
Thug Caroline Stage, Aire Digitiúcháin na Danmhairge, tacaíocht dá ráitis, ag rá go raibh an rialtas ‘ró-neamhchiontach’ nuair a lig siad do chomhlachtaí meán shóisialta cinneadh a dhéanamh ar conas a úsáideann daoine óga a n-ardáin.
Dúirt sí gur ‘dul chun cinn mór’ atá sa mholadh seo.
Léiríonn sonraí rialtais le déanaí go n-úsáideann go leor páistí sa Danmhairg mheáin shóisialta sula mbíonn siad 13.
Dar le figiúirí a luaigh an Príomh-Aire, tá próifíl meán sóisialta ag 94% de dhaltaí sa seachtú rang cheana féin, agus dúirt 60% de bhuachaillí idir 11 agus 19 mbliana d’aois nach mbíonn cairde acu le bualadh leo le linn am saor.
Tagann na moltaí seo i ndiaidh reachtaíochta le déanaí a chuir cosc ar fhóin phóca i scoileanna agus i gclubanna iarscoile.
Tá siad bunaithe ar mholtaí ó choimisiún folláine a bunaíodh níos túisce i mbliana.
Mhol an coimisiún sin nach mbeadh fón cliste ná táibléad ag páistí faoi bhun 13.
Luaigh Frederiksen go bhfuil teorainneacha aoise den chineál céanna molta nó curtha i bhfeidhm i dtíortha eile, lena n-áirítear an Astráil agus an Iorua.
Dúirt sí go bhfuil bearta na Danmhairge dírithe ar shláinte mheabhrach, cumas dírithe agus folláine iomlán na bpáistí a chosaint.
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
