Deir formhór na gcuideachtaí fuinnimh nach féidir leo a rá go laghdóidh siad na costais ollmhóra atá le híoc ag teaghlaigh anois, in ainneoin an laghdaithe ar chostas breosla.
D’iarr an tAire Comhshaoil Eamon Ryan orthu praghsanna a ghearradh.
Tá praghsanna mórdhíola (wholesale) leictreachais ag titim toisc go bhfuil laghdú tagtha ar chostas an gháis nádúrtha ar mhargaí domhanda.
Mar sin féin, tá teaghlaigh fós ag íoc suas le €4,000 sa bhliain ar fhuinneamh.
Dúirt an tAire Ryan: ‘Tá 13 chuideachta soláthair éagsúla againn agus iad siúd atá in ann an praghas sin a laghdú chun teacht leis an laghdú atá le feiceáil againn ar na margaí mórdhíola, sílim go mbeidh fíordheis acu.’
Léiríonn figiúirí ó Údarás Fuinnimh Inmharthana na hÉireann (Sustainable Energy Authority of Ireland) go bhfuil teaghlaigh ag íoc 44 cent an KW/h ar an meán as a gcuid leictreachais, 70% níos mó ná meánphraghas mórdhíola na míosa seo caite.
Mar sin féin, ní raibh an chuid is mó de na cuideachtaí fuinnimh a ndeachaigh an Irish Mail on Sunday i dteagmháil leo in ann gealltanas a thabhairt go laghdófaí a gcuid praghsanna.
Dúirt an chuid is mó gurb é seo toisc go gceannaíonn siad a gcuid táirgí roimh ré. Mar sin féin, dúirt Dermott Jewell ó Chomhlachas Tomhaltóirí na hÉireann (Consumers’ Association of Ireland) go bhfuil an míniú sin ‘thar a bheith lag’.
Dúirt sé: ‘Má cheannaíonn tú ar aghaidh, is féidir leat pleanáil ar aghaidh i gcónaí maidir le conas a bhainisteoidh tú do bhrabúis. Agus tá a fhios acu go díreach cad iad na corrlaigh bhrabúis (profit margins) atá acu faoi láthair.’
Dúirt urlabhraí do chuideachta leictreachais an Stáit ESB: ‘Cé go bhfuil laghdú tagtha ar mhargaí mórdhíola le míonna beaga anuas, tá siad fós ag leibhéil i bhfad níos airde – ag iolraí dá leibhéil roimh an ngéarchéim.
‘De ghnáth déanann soláthraithe fuinnimh costais fuinnimh a fhálú roimh ré chun costais a chinntiú don bhliain atá le teacht, agus mar sin is féidir go dtógfaidh sé roinnt ama chun aon mhéaduithe nó laghduithe ar an margadh mórdhíola a chur san áireamh sna praghsanna miondíola (retail) a fheiceann custaiméirí cónaithe.’
Dúirt urlabhraí thar ceann Bhord Gáis: ‘Ceannaímid fuinneamh suas le 18 mí [agus uaireanta níos faide] roimh an am a úsáideann ár gcustaiméirí é. Déanaimid é seo chun ár gcustaiméirí a chosaint, a mhéid is féidir linn, ó luaineacht (volatility) an mhargaidh.
‘Tá sé seo thar a bheith tábhachtach i bhfianaise luaineacht mhór praghsanna na margaí fuinnimh le 18 go 24 mí anuas, ó thosaigh praghsanna ag ardú go luath i samhradh 2021.
‘Ar an gcúis seo, níl an luaineacht anuas i bpraghsanna mórdhíola fuinnimh, agus go háirithe praghsanna an lae roimh ré, le feiceáil i bpraghsanna reatha custaiméirí agus ní bheidh sé sin go ceann tamaill.’
Dúirt SSE Airtricity nach ndéanann sé ‘tuairimíocht ar chinntí praghsála amach anseo, déanaimid monatóireacht ghníomhach ar mhargaí fuinnimh agus, mar atá déanta againn cheana, féachfaimid lenár bpraghsanna a laghdú a luaithe is a cheadaíonn coinníollacha an mhargaidh’.
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
