Rinne fear i mBaile Átha Cliath iarracht dúnmharfóir a íoc chun beirt bhan a bhí cairdiúil ar an idirlíon lena bhean chéile a mharú.
Dúirt sé go rinne sé é ‘le teann grá agus briseadh croí’.
D’íoc Bryan Kennedy €8,000 le fear a d’iompaigh ansin, agus a thosaigh á bhagairt agus ag iarraidh dúmhál (blackmail) a dhéanamh air.
Tá ceithre bliana go leith príosúin gearrtha ag Kennedy anois, atá 35 bliain d’aois, tar éis dó dúnmharfóir ar pá a earcú leis an beirt bhan as Ceanada a mharú mar bhí siad cairdiúil ar an idirlíon lena bhean chéile.
Dúradh sa bPríomhchúirt Choiriúil go raibh Kennedy, as Ascaill Chnocán Tallant i gCrois Araild (Mount Tallant Avenue, Harold’s Cross) i mBaile Átha Cliath ‘imithe as smacht ar fad’ ag an am.
Insíodh don Chúirt gur chuir a bhean chéile aithne ar na mná, as Quebec i gCeanada, tré chluichí idirlín agus ar Facebook.
Thosaigh caidreamh eatarthu agus thosaigh a bhean chéile ag fanacht ina suí ar feadh na hoíche agus ina codladh ar feadh an lae.
D’íoc sé €8,000 le ‘Mr X’ leis an mbeirt a mharú. Bhí aithne aige ar Mr X ó gheataí na scoile. Dúirt an Breitheamh Caroline Biggs gur cuireadh Kennedy ar an eolas gur fear contúirteach a bhí i Mr X. Dúirt an Breitheamh nach leithscéal ar bith é go raibh a bhean i mbun caidrimh taobh amuigh den phósadh.
Phléadáil Kennedy ciontach i dhá chúis faoi iarracht a dhéanamh duine eile a earcú leis na mná a mharú, idir mí Deireadh Fómhair 2019 agus mí Eanáir 2020.
Tá ceithre bliana go leith príosúin gearrtha air. Ach tá sé sin curtha siar go ceann trí mhí le deis a thabhairt dó socruithe cuí a dhéanamh le aire a thabhairt dá chlann.
Tá a bhean i dtuilleamaí cathaoir rothaí agus is é Bryan Kennedy anois príomhchúramóir na páistí ó fuair sé féin agus a bhean colscaradh.
Dúirt aturnae cosanta Dominic McGinn leis an gcúirt go raibh iar-bhean chéile Kennedy in éineacht leis ag teacht chun na cúirte, in éineacht lena dheartháir agus a dheirfiúr a bhí ag tacú leis.
Dúirt sé leis an mbreitheamh gur aontaigh Kennedy agus a bhean chéile, is cuma cén tacaíochtaí a cuireadh ar fáil don teaghlach, nach bhféadfaidís an leibhéal cúraim a thug a n-athair do na leanaí a athsholáthar.
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
