D’fhéadfaí cúram dochtúra teaghlaigh saor in aisce a thabhairt isteach do gach duine in Éirinn, laistigh de thrí bliana, ar uaschostas de €880 milliún do cháiníocóirí, de réir taighde nua.
Bheadh an costas idir €381 milliún agus €881 milliún, dar leis an Institiúid Taighde Eacnamaíochta agus Sóisialta (Economic and Social Research Institute, ESRI).
Tá an méid níos ísle bunaithe ar éileamh íseal agus tá an figiúr níos airde i gcás éileamh ard.
Meastar i bpáipéar nua ón ESRI go dtabharfar 2.3 milliún duine cuairt bhreise ar Dhochtúirí Teaghlaigh in 2026 má chuirtear cúram saor in aisce ar fáil de réir a chéile.
Is ionann é sin agus méadú 12% ar líon na daoine a fhaigheann cúram Dochtúra Teaghlaigh saor in aisce faoi láthair.
Mar atá sé faoi láthair, is féidir le leanaí cúig bliana d’aois agus níos óige, agus daoine atá 70 bliain d’aois agus níos sine cúram Dochtúra Teaghlaigh a fháil saor in aisce, agus do dhaoine eile tá sé bunaithe ar a n-ioncam.
Léiríonn na figiúirí is déanaí, ó 2019, nach bhfuil cárta leighis nó cárta cuairte saor in aisce ag thart ar 56% den daonra.
Mar chuid den phlean Sláintecare – a bhfuil tacaíocht traspháirtí faighte aige – ba cheart go mbeadh cúram Dochtúra Teaghlaigh saor in aisce don daonra ar fad.
Mheas taighde an ESRI an costas trí dhá phlean dhifriúla a chur i gcomparáid: ceann amháin bunaithe ar aois, agus an ceann eile bunaithe ar ioncam.
Meastar gurb é an costas a bhaineann le cúram dochtúra teaghlaigh saor in aisce a thabhairt do gach duine in 2026, ná idir €462 milliún agus €881 milliún, má tá sé bunaithe ar aois, agus gurb é an costas idir €381 milliún agus €881 milliún, má tá sé bunaithe ar ioncam.
Sa chur chuige aoisbhunaithe, glactar leis go dtabharfar isteach cúram saor in aisce i mbliana do leanaí sé agus seacht mbliana d’aois, in 2024 do dhaoine idir 50-69 bliain d’aois, in 2025 dóibh siúd atá idir ocht agus 17 mbliana d’aois, agus in 2026 do dhaoine idir 18 agus 49 mbliana d’aois.
Faoin gcur chuige bunaithe ar ioncam, glacadh leis go leathnófaí tairseacha ioncaim do chárta cuairte dochtúra teaghlaigh in 2024, 2025 agus 2026, agus go mbeadh an tríú cuid de na daoine incháilithe gach bliain.
Dúradh sa tuarascáil, má leathnaítear cúram dochtúra teaghlaigh saor in aisce chuig an daonra thar ‘thréimhse réasúnta gearr’, go bhféadfadh cur chuige bunaithe ar aois a bheith ‘pragmatach’.
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
