Tá sé fógartha ag laoch Mhaigh Eo Lee Keegan nach mbeidh sé ag imirt dá fhoireann chontae a thuilleadh.
Thug sé ómós dá bhean chéile Aoife agus dúirt go bhfuil beirt pháistí beaga acu, Lile agus Rhea, agus go dteastaíonn níos mó ama uaidh chun an tacaíocht atá de dhíth ar an teaghlach a thabhairt di.
Cuirfidh an scéal isteach ar bhainisteoir nua an chontae, Kevin McStay, a dúirt go dtí an tseachtain seo caite go raibh súil aige go bhfanfadh Keegan leis.
In ainneoin an iliomad gradam atá buaite ag Keegan, agus gur imir sé i sé chluiche ceannais na hÉireann, is é bonn Craobh na hÉireann gradam amháin nár bhuaigh sé riamh.
Chuir Spórt RTÉ McStay faoi agallamh an tseachtain seo caite faoi Keegan, ag ceistiú an bhfanfadh sé le Maigh Eo, agus rinne sé magadh: ‘Is léir go bhfuil muid tar éis bualadh leis agus é a chealgú agus a bhréagnú agus é a chur isteach i nglas cinn (headlock) agus é a chiceáil agus rinne muid pé rud a d’fhéadfaimis leis. Ach is cinneadh mór dó. Tá teaghlach óg aige. Ach táimid dóchasach.’
Ainmníodh an cosantóir, atá 33 bliain d’aois, mar Peileadóir na Bliana in 2016 agus ainmníodh é don ghradam in 2013 agus 2021.
Dúirt McStay: ‘Rinne Lee ionadaíocht thar barr do Mhaigh Eo. Bhí sé ‘indestructible’ agus dúshlánach: ar na laethanta is mó, bhí sé bródúil. Leanfaidh an sampla a leag sé amach ag spreagadh Mhaigh Eo go ceann blianta fada amach anseo.’
Mar sin féin, ní bhfuair Lee lámh ar Chorn Sam Maguire mar imreoir buaite. Bhí baint aige le sé chluiche ceannais na hÉireann dá chontae ach, rud a chuir frustrachas ar Lee, ar fhoireann Mhaigh Eo agus ar na mílte lucht leanúna, tháinig sé sa dara háit sna cluichí sin ar fad.
Tá go leor duaiseanna buaite aige, áfach, lena fhoireann agus ina n-aonar. Bhuaigh sé cúig ‘All-Stars’, seacht gcluiche Chraobh Chonnacht, agus bonn Sraithe Peile Allianz ó 2019.
D’imir sé ceithre huaire d’Éirinn freisin sa tSraith Rialacha Idirnáisiúnta in aghaidh na hAstráile, agus ainmníodh é mar leas-chaptaen do shraith 2015.
Níl an t-imreoir do Chathair na Mart (Westport) tar éis an pheil a thabhairt suas áfach agus leanfaidh sé ag imirt dá chlub, a bhuaigh a gcéad teideal sinsear in 2022.
Ach dúirt sé go bhfuil teaghlach óg aige agus gur chiallaigh sé sin nach bhfuil an t-am riachtanach aige a thuilleadh le tiomantas iomlán a thabhairt d’fhoireann an chontae.
Laoch conspóideach Johhny
Cooper ag éirí as imirt
do na Dubs. CLICK ANSEO
‘Bhain mé sult as gach nóiméad de mo chuid ama le Maigh Eo. Bhí laethanta iontacha againn agus buanna freisin. Maidir liom féin, bhí áthas orm i gcónaí an geansaí Mhaigh Eo a chaitheamh le bród gach lá, agus ba mhór an onóir dom imirt in éineacht le himreoirí a bhí ar aon intinn liom, agus faoi bhainisteoirí a thiomáin caighdeáin arda ar an bpáirc agus as.
‘Ach caithfidh gach rud maith teacht chun deiridh. Is é fírinne an scéil go raibh orm brath ar go leor daoine – go háirithe mo bhean chéile Aoife – chun an t-am agus an spás a thabhairt dom mo bhrionglóid a leanúint. Anois agus beirt pháistí óga againn, Lile agus Rhea, tuigim go maith nach bhfuil mé in ann a thuilleadh a ghealladh don pheil idirchontae mar a rinne mé le 11 bliain anuas.
‘Leanfaidh mé ag cur mé féin ar fáil do Chathair na Mart agus táim ag tnúth le leanúint ar aghaidh tar éis rath stairiúil na bliana seo caite, sna blianta amach romhainn.
‘Guím gach rath ar Mhaigh Eo in 2023 agus ina dhiaidh sin. Beidh mé leo ó na hardáin. Eispéireas neamhghnách a bheidh ann domsa, táim cinnte, ach is mar sin atá an saol.’
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
