Agus an Nollaig ag teannadh linn táthar ag tabhairt foláireamh do theaghlaigh a bhfuil leanaí óga acu, nach don Nollaig amháin atá peata.
Agus má tá sé beartaithe ag tuismitheoirí peata a cheannach dá bpáistí i mbliana, tá rabhadh á thabhairt dóibh a bheith ag faire amach do pheataí ó fheirmeacha coileán (puppy farms).
Tá pionóis níos déine á lorg ag Dogs Trust Ireland d’fheirmeoirí coileáin agus iad ag iarraidh dul i ngleic leis an ‘anró uafásach’ a chuirtear ar ainmhithe.
Tá feachtas Puppy Farms are a Life Sentence’ seolta ag an gcarthanas, tar éis dóibh €61,000 a chaitheamh ar tháillí tréidliachta amháin do 161 madra a tógadh ar na feirmeacha le dhá bhliain anuas. Tháinig an chuid is mó de na madraí seo ó dhá fhoinse – gearradh fíneáil níos lú ná €2,000 an duine orthu.
Déanann feirmeacha coileáin madraí a phórú (breed) go dian gan mórán machnaimh á dhéanamh ar a leas. Bítear ag súil go minic go bpóróidh madraí baineanna go leor coileáin in aghaidh na bliana.
Tá Dogs Trust ag iarraidh pionóis níos géire a ghearradh orthu siúd atá freagrach.
Dúirt Ciara Murran ó Dogs Trust Ireland: ‘Táimid ag iarraidh ar dhaoine tacú lenár bhfeachtas chun dúil an phobail i leith pionós níos géire a léiriú d’fheirmeoirí coileáin.’
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
