Chuir ionróir páirce (pitch invader), a bhí ag iompar bratach Bród, isteach ar imeachtaí nuair a bhuail an Phortaingéil le Uragua i gCorn Domhanda Catar tráthnóna Dé Luain.
Cúpla nóiméad isteach sa dara leath den chluiche, a bhuaigh an Phortaingéil 2-0 sa deireadh, cuireadh isteach ar na himeachtaí nuair a rith ball den slua isteach ar pháirc Staid Lusail.
Bhí T-léine á chaitheamh aige le ‘Save Ukraine’ ar an brollach agus ‘Respect for Iranian Women’ ar a chúl, agus bratach tuar ceatha (rainbow flags) á iompar aige freisin.
Chuaigh triúr gardaí slándála i ndiaidh an agóideoir, a bhí i mbaol mór, chun é a tharraing as an bpáirc.
Bhí go leor conspóidí ag Corn an Domhain i gCatar ó thús, mar gheall ar an gcaoi ar chaith an náisiún leis an bpobal LADT, oibrithe inimirceacha agus toisc gur ghlac FIFA le héileamh Catar nár cheart cead a thabhairt do chaptaein foirne na bandaí muinchille ‘OneLove’ agus bratacha Bród a chaitheamh.
Ceadaítear dathanna tuar ceatha ag staidiamaí anois, ach bhí cosc ar lucht leanúna roimhe seo dul isteach i staidiamaí má bhí siad ag caitheamh dathanna tuar ceatha de chineál ar bith.
Sna cluichí tosaigh, chlúdaigh imreoirí na Gearmáine a mbéal le haghaidh a ngrianghraf foirne chun agóid a dhéanamh i gcoinne FIFA ag cur bac ar chaitheamh na mbannaí OneLove.
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
