Labhair Helen Mirren faoina caidreamh le laoch aisteoireachta na hÉireann Liam Neeson, ag rá go raibh ‘grá acu dá chéile’.
Ba bhliain gnóthach í 2022 do Mirren. Rinne sí an t-aithris don turas, Mr Morale and the Big Steppers le Kendrick Lamar, agus beidh sí le feiceáil i bpictiúrlanna an Nollaig seo mar an bithiúnach sa scannán nua Shazam
Tháinig Mirren agus Neeson le chéile agus iad ag obair ar an scannán Excalibur, i 1981, agus bhí siad ag cónaí le chéile ar feadh roinnt blianta.
Thosaigh Mirren ag dul amach leis an bhfear a bheadh ina fear céile ar deireadh thiar, an stiúrthóir Meiriceánach Taylor Hackford, i 1986, tar éis di féin agus Neeson deireadh a chur lena gcaidreamh.
Ag breathnú siar ar an am a chaith siad le chéile, dúirt Mirren nach raibh seans ann go mbeadh sí féin agus Neeson le chéile i gcónaí, ainneoin an nasc láidir a bhí acu.
Ag labhairt di leis an iris AARP, d’inis Mirren, a bhuaigh Oscar as a ról sa scannán The Queen, faoin nasc atá aici le Neeson, agus faoin ngrá atá aici as éadaí a dhéanamh, lena n-áirítear léinte na bhfear.
‘Rinne mé ceann do Liam, rud aisteach go leor. Bhí grá againn dá chéile. Ach ní raibh sé riamh i gceist gur cheart dúinn a bheith le chéile ar an mbealach sin, ach bhí an-ghrá againn dá chéile. Is breá liom é fós. Is fear iontach é,’ a dúirt sí.
Phós Neeson an t-aisteoir Natasha Richardson i 1994, agus bhí beirt mhac acu sula bhfuair sí bás i Márta 2009.
San agallamh freisin, thug Mirren léargas ar an saol atá aici agus í ag dul in aois, agus na gnéithe dá saol laethúil a athraíonn dá bharr.
Dúirt sí: ‘Na smaointe a bhíonn agat nuair a bhíonn tú 16 bliana d’aois, bíonn na smaointe céanna agat agus tú 76 bliana d’aois, rud atá an-ait.
‘Gach bliain, déanaim rúin na hAthbhliana céanna: ní mhoilleoidh (procrastinate) mé. Agus gach bliain, déanaim é. Déanfaidh mé cumarsáid níos fearr. Agus gach bliain, theipeann orm cumarsáid níos fearr a dhéanamh. Fanann droch-thréithe áirithe leat go deo, feictear domsa.
‘Is duine iomlán difriúil mé i gcomparáid leis an duine a raibh mé ag 22 nó 23 bliana d’aois. Athraíonn do chraiceann fiú. Athraíonn do chorp. Athraíonn an chaoi a n-oibríonn d’intinn.’
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
