Thuill Trump breis agus $2 bhilliún as criptea-airgeadraí – agus as Bíoblaí a raibh a ainm orthu

Cúisíodh Donald Trump as uachtaránacht na Stát Aontaithe a úsáid chun a shaibhreas pearsanta a mhéadú tar éis do thuairiscí a léiriú gur thuill sé breis agus $2 bhilliún ó ghnólachtaí criptea-airgeadraí le linn a chéad bhliana ar ais sa Teach Bán.

Léirigh sonraí i dtuarascáil nochta airgeadais Trump gur ó thionscadail criptea-airgeadraí a raibh baint ag a theaghlach leo a tháinig cuid mhór dá ioncam.

Thuill Trump $515 milliún ó dhíol comharthaí digiteacha a bhí bainteach le World Liberty Financial, comhlacht criptea-airgeadraí atá á bhainistiú i bpáirt ag a mhic, Donald Trump Jr agus Eric Trump.

Fuair sé thart ar $65 milliún freisin ó dhíol sealúchas cothromais eile.

Ba é an bonn ‘meme’ criptea-airgeadraí ($TRUMP) an fhoinse ioncaim ba mhó a bhí aige, de réir na tuarascála. Dúradh inti gur thuill sé $635 milliún ón tionscadal sin.

Sheol Trump an criptea-airgeadra sin cúpla lá sular fhill sé ar an Teach Bán don dara téarma mar uachtarán.

Le linn turais ar eitleán nua Air Force One, Boeing 747-8 a raibh luach thart ar $400 milliún air agus a thug Catar mar bhronntanas, dúirt Trump: ‘Táimid an-bhródúil as seo. Tá an tír an-bhródúil as freisin. Is féidir leat é a choimeád ciúin nó is féidir leat é a thaispeáint.’

Dhiúltaigh sé d’imní faoi na hioncaim a thuill sé agus faoi choinbhleachtaí leasa féideartha.

‘Thuill mé a lán airgid sular éirigh mé i m’uachtarán,’ a dúirt sé.

Dúirt Elizabeth Warren, an Daonlathach is sinsearaí ar Choiste Baincéireachta an tSeanaid, go raibh ‘éilliú follasach criptea-airgeadraí’ ar siúl ag Trump.

Cháin Daonlathaigh ar Choiste Maoirseachta Theach na nIonadaithe na brabúis a rinne Trump agus a theaghlach freisin.

Dúirt siad go bhfuil Trump ag cur le saibhreas a theaghlaigh trí scéimeanna gnó digiteacha, agus go bhfuil sé sin ag tarlú tráth a bhfuil go leor Meiriceánach ag streachailt le híoc as bia agus tithíocht.

Mhaígh siad chomh maith gur ghin na gníomhaíochtaí sin thart ar $2.25 billiún i mbrabúis do Trump ó íocaíochtaí eachtracha, ó olagarcaigh shaibhre agus ó fhoinsí eile.

Dar leis na Daonlathaigh, ba cheart don Uachtarán Trump a bheith ag freastal ar mhuintir Mheiriceá seachas a shaibhreas féin a mhéadú.

Dúirt Juliana Stratton, Leas-Ghobharnóir Illinois agus iarrthóir Daonlathach do Sheanad SAM, go raibh ‘saint gan teorainn’ Trump ‘gránna’.

Dúirt sí go bhfuil sé ag úsáid oifig an uachtaráin chun billiúin dollar a shaothrú agus go bhfuil go leor teaghlach Meiriceánach fós ag streachailt lena mbunriachtanais a shásamh.

Léirigh an tuarascáil go bhfuil sócmhainní digiteacha anois ar cheann de na hinfheistíochtaí is brabúsaí atá ag Trump.

Thug sí le fios freisin gur chuidigh siad le ceann de na hioncaim bhliantúla ba mhó riamh a tuairiscíodh ag uachtarán de chuid SAM agus é in oifig.

Dúirt Gobharnóir California, Gavin Newsom, gur chaill go leor daoine a rinne infheistíocht i dtionscadail criptea-airgeadraí Trump.

‘D’éirigh Trump níos saibhre, ach chaill go leor dá lucht tacaíochta sa mhargadh criptea-airgeadraí,’ a dúirt sé.

Liostaíodh foinsí eile ioncaim sa tuarascáil freisin.

Thuill Trump $4.7 milliún ó uaireadóirí ar a raibh ainm Trump. Fuair sé íocaíochtaí freisin ó Bhíobla ar a raibh ainm Trump agus breis agus $67,000 ó bhróga spóirt agus ó chumhráin a raibh an branda céanna orthu.

Scéalta Gaeilge ExtraG.ie
ar fáil ar ríomhphost (email)

• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.

• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie

Cliceáil ar cheann de na lógónna chun an stáisiún teilifíse agus na stáisiúin raidió Gaeilge a fháil