Tá foláirimh nua maidir le báisteach throm agus tuilte féideartha eisithe do cheantair áirithe i ndiaidh an aimsir uafásach a tháinig le Stoirm Chandra Dé Máirt agus Dé Céadaoin.
Tá foláireamh báistí Buí eisithe ag Met Éireann do chontae Bhaile Átha Cliath, Cheatharlach, Chill Chainnigh, Loch Garman, Chill Mhantáin, agus Phort Láirge a bheidh i bhfeidhm an lá ar fad Déardaoin agus ar feadh chuid den Aoine.
Mar gheall ar an mbáisteach throm níos luaithe sa tseachtain, ní bheidh mórán deiseanna ann d’uisce draenáil amach, mar sin is féidir a bheith ag súil le tuilte agus le haibhneacha ag cur thar maoil i go leor ceantar.
Tá foláireamh báistí Buí eisithe ag an Met Office freisin do chontae ó thuaidh den teorainn, a mhairfidh ó mheán oíche Dé Céadaoin go dtí 6pm Dé hAoine.
Tá tionchar ag na tuilte den chuid is mó ar Chontae Loch Garman, Chontae Chill Mhantáin, agus deisceart Bhaile Átha Cliath.
I ndeisceart Bhaile Átha Cliath, dhúisigh cónaitheoirí forbartha tithíochta i gCill Tiarnáin (Kiltiernan) le huisce ag rith trína dteach tar éis do shruthán a bhruacha a bhriseadh.
Bhí drochthionchar ar bhaile Inis Córthaidh (Enniscorthy) i Loch Garman. D’fhág tuilte tithe agus gnólachtaí faoi uisce, gluaisteáin sáinnithe, gearradh cumhachta agus lár an bhaile dúnta tar éis d’Abhainn na Sláine (Slaney) a bruacha a bhriseadh tar éis báisteach throm oíche Luain agus isteach sa Mháirt.
B’éigean roinnt cónaitheoirí a tharrtháil óna dtithe mar bhí sé neamhshábháilte dóibh iarracht a dhéanamh imeacht leo féin.
In ainneoin an damáiste a rinne na tuilte, níor eisigh Met Éireann rabhadh báistí do Bhaile Átha Cliath mar ní thugann siad rabhadh ach faoi leibhéal na báistí agus ní faoi cé chomh fliuch is atá an talamh cheana féin.
Dheimhnigh an Taoiseach gurbh iad Baile Átha Cliath, Cill Mhantáin, Loch Garman agus Corcaigh na ceantair ba mheasa a ndeachaigh an stoirm i bhfeidhm orthu, agus d’fhógair sé go mbeadh íospartaigh na stoirme in ann tacaíochtaí airgid éigeandála a fháil.
Bhí criúnna údaráis áitiúil amuigh ag déileáil le cuid de na fadhbanna agus an Roinn Coimirce Sóisialaí ag eisiúint Íocaíochtaí Freagartha Éigeandála do theaghlaigh le costais gan choinne i ndiaidh na stoirme.
Idir an dá linn, tá an scéim tacaíochta gnó agus pobail á cur i ngníomh chun cabhrú le gnólachtaí atá ag streachailt filleadh ar a gcosa agus iarrachtaí glantacháin ag leanúint ar aghaidh.
D’admhaigh an tAire Tithíochta, James Browne, teipeanna maidir le daoine a chur ar an eolas faoi Stoirm Chandra tar éis do thuilte troma codanna d’oirthear agus d’oirdheisceart na hÉireann a bheith buailte ag an am céanna.
Dúirt sé: ‘Sílim go gcaithfidh Met Éireann a gcumarsáid a fheabhsú.’
Agus dúirt an Tánaiste Simon Harris ag cruinniú de pháirtí parlaiminte Fhine Gael go gcaithfear le scéimeanna faoisimh tuilte mar ‘bhonneagar criticiúil’ faoi dhlíthe éigeandála nua atá le tabhairt isteach.
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
