Tá Kate O’Connor anois ar dhuine de na lúthchleasaithe is fearr in Éirinn. Bhuaigh sí bonn airgid ag na Craobhacha Domhanda faoi Dhíon i Nanjing, an tSín, an tseachtain seo caite.
Ba é seo an chéad bhonn a bhuaigh Éire sa chomórtas seo le fiche bliain, ó bhuaigh Derval O’Rourke an ceann deireanach.
Ní raibh an bua seo aici ina haonar, áfach.
Is é a hathair, Michael O’Connor, a cóitseálaí, agus bíonn sí ag traenáil lena deartháir agus deirfiúr chomh maith.
Dúirt sí go bhfuil an nasc idir í féin agus a hathair difriúil ó theaghlaigh eile.
Bhí sí ag magadh faoi agus dúirt sí go mbíonn a hathair i gcónaí ag faire ar gach rud a dhéanann sí, fiú ag bainiseacha teaghlaigh
‘Bheadh sé ag féachaint ar gach braon uisce a ólaim, agus ar an taobh eile, bheadh sé ag rá le mo dheartháir agus mo dheirfiúr, “Sláinte!”’
Tá go leor buntáistí ann do Kate a hathair a bheith mar chóitseálaí aici. Ceann de na rudaí is fearr ná nach bhfuil aon rún ann eatarthu.
Má bhíonn gortú beag aici nó má bhíonn rud éigin nach bhfuil ag obair go maith sa traenáil, tá sé éasca labhairt faoi.
Ar an taobh eile, uaireanta is féidir rudaí a ghlacadh go pearsanta. D’admhaigh Kate go raibh orthu beirt oibriú air sin le cúpla bliain anuas.
Cabhraíonn sé nach bhfuil sí ina cónaí sa bhaile i nDún Dealgan a thuilleadh mar tá sí ag staidéar i mBéal Feirste.
Ach deir sí gur rud álainn é a bheith in ann taisteal timpeall an domhain lena hathair agus a bheith chomh gar dá teaghlach.
Téann sí abhaile gach deireadh seachtaine le traenáil agus is minic go mbíonn ceathrar de theaghlach Uí Chonchúir ar an bpáirc le chéile.
‘Sílim go ndéanann sé ár dteaghlach níos láidre. Uaireanta bímid go léir ag gearán faoi, ach ar an iomlán, is maith linn a bheith le chéile.’
D’fhoghlaim Kate ceacht tábhachtach anuraidh.
Thuig sí go raibh sí ag díriú an iomarca ar an traenáil agus ag déanamh dearmad ar an taobh sóisialta dá saol. D’fhág sé sin í ag mothú beagáinín scoite amach ó dhaoine eile.
Labhair sí le síceolaí spóirt agus fuair sí comhairle mhaith: ‘Chun go n-éireoidh le rud amháin, caithfidh tú aire a thabhairt do na rudaí eile i do shaol freisin.’
Mar sin, i mbliana, tá iarracht á dhéanamh aici níos mó ama a chaitheamh lena cairde.
Fiú más rud é cupán caife tapaidh nó teachtaireacht a sheoladh, creideann sí go bhfuil sé tábhachtach.
‘Má bhíonn do shaol lasmuigh den spórt taitneamhach, cabhraíonn sé leis an spórt féin.’
Chuir sí stair nua ar fáil d’Éirinn nuair a bhuaigh sí bonn airgid sa phentathlon i Nanjing.
Bhí sí ag brath ar rás an 800m chun an dara háit a fháil agus d’éirigh léi go hiontach.
An rud is suimiúla ná nach bhfuil an t-imeacht is fearr léi, an gcaitheadh sleá, mar chuid den chomórtas faoi dhíon.
Tá sí ina seaimpín Éireannach sa chaitheadh sleá agus glacann sí páirt i gcomórtais heiptathlon amuigh faoin aer, áit a bhfuil an t-imeacht sin ina buntáiste mór aici.
Tá pleananna móra ag Kate don todhchaí. Tá sí ag smaoineamh ar na Cluichí Oilimpeacha i Los Angeles agus ba mhaith léi bonn a bhuachan ann.
Tá súil aici go mbeidh sí ar an ardán ann, díreach mar a bhí sí sa tSín.
D’éirigh go maith léi ag na Cluichí Oilimpeacha i bPáras, in ainneoin na ndeacrachtaí a bhí aici roimhe sin le gortuithe.
Bhí sí an lúthgháireach bheith páirteach ann ach anois tá sí ag díriú ar níos mó ná sin.
‘Ní leor dom a bheith páirteach sna cluichí; ba mhaith liom dul ann agus torthaí móra a bhaint amach.’
Tar éis an ratha seo, tá plean aici tamall a ghlacadh chun scíth a ligean.
Beidh sí ag tabhairt cuairte ar a buachaill, Georgie Kelly, atá ina pheileadóir do Carlisle United i Sasana.
Ansin, beidh sí le feiceáil ar The Late Late Show ar an Aoine.
Gan dabht, tá todhchaí gheal roimh Kate O’Connor agus beidh lucht leanúna na hÉireann ag faire go géar ar a cuid éachtaí amach anseo.
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
