Tá €16 billiún sa bhreis le caitheamh ag an mBreatain ina buiséad míleata le hiarracht a dhéanamh ar Donald Trump a shásamh sula dtabharfaidh an Príomh-Aire Keir Starmer cuairt ar Mheiriceá.
Mar sin féin, tá Starmer, atá ina cheannaire ar Pháirtí an Lucht Oibre sa Bhreatain, cáinte as cúnamh a ghearradh chun níos mó airgid a chaitheamh ar airm.
Buailfidh Starmer le Trump, Déardaoin i Washington, agus tagann sin tar éis d’uachtarán na Fraince, Emmanuel Macron, bualadh le hUachtarán Mheiriceá agus diúltú dá chuid éileamh faoi thacaíocht Eorpach don Úcráin.
Dúirt Starmer go n-ardóidh an Bhreatain a caiteachas míleata go 2.5% den aschur eacnamaíoch faoi 2027, agus go 3% má thoghtar é sa chéad olltoghchán eile.
Ciallaíonn an cinneadh méadú €16 billiún sa bhliain ar an arm agus ar airm idir seo agus 2027.
Dúirt Starmer, áfach, go laghdóidh an rialtas cúnamh forbartha thar lear ó 0.5% den olltáirgeacht intíre go 0.3%.
Dúirt sé go raibh aiféala air faoin gcinneadh agus dúirt: ‘In amanna mar seo, ní mór cosaint agus slándáil mhuintir na Breataine a theacht chun tosaigh i gcónaí.’
Tá an t-aistriú molta cheana féin ag Rúnaí Cosanta Trump Pete Hegseth, a dúirt gur ‘céim láidir ó chomhpháirtí marthanach’ é.
Agus dúirt páirtí Reform sa Bhreatain, páirtí i bhfad ar dheis, go bhfuil an cinneadh cúnamh a ghearradh ar cheann dá bheartais féin.
Dúirt Sarah Champion, cathaoirleach choiste forbartha idirnáisiúnta Theach na dTeachtaí: ‘Is geilleagar bréagach é an buiséad cúnaimh a ghearradh chun caiteachas ar chosaint a mhaoiniú a fhágfaidh nach mbeidh an domhan chomh sábháilte.’
Cháin iar-aire Pháirtí an Lucht Oibre Clare Short an cinneadh cúnamh a ghearradh agus dúirt sí: ‘Is eagal liom, ar go leor bealaí, nach rialtas an Lucht Oibre é seo.’
Dúirt sí freisin nach mbeidh lucht tacaíochta a páirtí aontaithe a thuilleadh agus go scriosfar ‘páirtí traidisiúnta an Lucht Oibre’.
D’éiligh Trump go n-ardódh tíortha Eorpacha a gcaiteachas ar airm agus ar chumhacht mhíleata agus tá sé tugtha le fios ag go leor acu go ngéillfidh siad dá chuid éileamh.
Mar sin féin, nuair a d’éiligh sé go raibh formhór mór na tacaíochta airgeadais curtha ar fáil ag na Stáit Aontaithe don Úcráin, os comhair Macron, chuaigh uachtarán na Fraince salach ar a chéile.
Dúirt Seansailéir nua na Gearmáine, Friedrich Merz, a raibh an bua ag a pháirtí sa toghchán Dé Domhnaigh, go gcaithfidh an Eoraip straitéis slándála a ghlacadh atá neamhspleách ar na Stáit Aontaithe.
Mar sin féin, bhí Starmer níos fonnmhar Trump a shásamh. Dúirt sé: ‘Caithfidh muid diúltú d’aon rogha bréagach idir ár gcomhghuaillithe, idir thaobh amháin den Atlantach nó taobh eile.
Mhaígh sé gur ‘caidreamh speisialta’ é an caidreamh idir an Bhreatain agus na Stáit Aontaithe.
Dúirt Starmer: ‘Is caidreamh láidir é. Teastaíonn uaim go rachadh sé ó neart go neart.’
Tá buiséad cúnaimh gearrtha ag an mBreatain cheana féin, in 2020 nuair a bhí ceannaire Pháirtí Thoraí, Boris Johnson, ina phríomh-aire.
Agus tagann an gearradh tar éis do Trump ciorruithe ollmhóra a dhéanamh ar chúnamh eachtrach freisin.
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
