Deireadh tagtha leis na trí bliana gan chailliúint ag Kellie Harrington – ag   Craobhchomórtas na hEorpa

Tiocfaidh Kellie Harrington agus Niamh Fay abhaile ó Chraobh Dhornálaíochta na hEorpa le boinn chré-umha (bronze) ach tá Shannon Sweeney tríd go dtí an cluiche ceannais Dé Sathairn

Tá deireadh tagtha le réimeas Kellie Harrington ag dornálaíocht gan chailliúint.

Chaill laoch dornálaíochta Bhaile Átha Cliath i gcluiche leathcheannais 60kg Chraobh Dornálaíochta na hEorpa.

Bhuaigh Kellie bonn cré-umha di féin sa chomórtas i mBéalgrád mar níor éirigh léi an bua a fháil in aghaidh Natalia Shadrina ón tSeirbia, tráthnóna Déardaoin.

Theip ar Kellie, a bhuaigh bonn óir ag Cluichí Oilimpeacha Tóiceo, a bhuachan ina troid tar éis cinneadh scoilte (split decision) a bheith déanta ag na breithiúna.

Chuir an cinneadh sin deireadh lena 32 troid as a chéile gan chailliúint.

Ní raibh Kellie, atá 34 bliain d’aois, ag troid ar an leibhéal a dhéanann sí de ghnáth, rud is cúis imní mar nach bhfuil ach trí mhí le dul go dtí na Cluichí Oilimpeacha i bPáras.

Bhí nuacht níos fearr d’Éirinn, áfach, mar tá Shannon Sweeney tríd go dtí cluiche ceannais chuilmheáchain (flyweight) tar éis di bonn airgid ar a laghad a bhaint amach ina bua leathcheannais.

Bhí bua éasca ag Shannon ó Chontae Mhaigh Eo agus tá sí ag dul tríd go dtí an cluiche ceannais – fuair sí bua le  cinneadh d’aon ghuth  (unanimous decision) ar Anush Grigoryan ón Airméin.

Bhuaigh Shannon, atá 25 bliain d’aois, bonn cré-umha i gCraobhchomórtas Dornálaíochta na hEorpa i 2022, ach beidh sí san iomaíocht anois don bhonn óir i gcluiche ceannais 50kg Dé Sathairn.

Agus tiocfaidh Niamh Fay abhaile le bonn cré-umha tar éis di cailliúint sa bhabhta leathcheannais 54kg.

Bhí an bua ag Lacramioara Perijoc ón Rómáin i gcinneadh d’aon ghuth.

Scéalta Gaeilge ExtraG.ie
ar fáil ar ríomhphost (email)

• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com

• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.

• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie

Cliceáil ar cheann de na lógónna chun an stáisiún teilifíse agus na stáisiúin raidió Gaeilge a fháil