Tá bille €6686.28 seolta chuig Conradh na Gaeilge ó Uisce Éireann, le teachtaireacht go bhfuil sé ‘i bhfad thar téarma in ainneoin na cumarsáide roimhe sin’.
Tá an litir chuig Conradh na Gaeilge ó Uisce Éireann ag bagairt freisin caingean dlí leis an rabhadh:
‘Your account may be escalated to our Legal Services Team’.
Agus ar bharr na litreach tá fo-cheannlíne i litreacha troma a deir:
‘Pending debt referral’
Tá sé ráite ag Conradh na Gaeilge nach bhfuil siad ag diúltú a bhille uisce a íoc, ach go bhfuil siad ag fanacht leis an mbille i nGaeilge.
Dar le Conradh na Gaeilge, in ainneoin iarratais, tá teipthe ar Uisce Éireann bille a chur ar fáil i nGaeilge don gConradh, rud atá ina dhualgas reachtúil.
Is é Conradh na Gaeilge an príomhghrúpa in Éirinn a chinntíonn go gcloíonn comhlachtaí Stáit lena ndualgais reachtúla i leith na Gaeilge, mar sin, ba mhór an t-ionadh é dá nglacfaidís lena gcuid billí féin i mBéarla amháin.
D’ardaigh an eagraíocht an cás ar X (Twitter). Deir teachtaireacht a postáladh ar X Dé Máirt:
‘FAO @IrishWater: Ní ghlacfaimid le billí i mBéarla amháin ó údaráis a bhfuil dualgas orthu seirbhís i nGaeilge a chur ar fáil don phobal.’
Tá cóip den bhille ceangailte leis an teachtaireacht.
Chomh maith leis sin chuir Conradh na Gaeilge teachtaireacht i mBéarla ar X chun an cheist a shoiléiriú:
‘All bills received from authorities who have a statutory duty to provide service in Irish are, and will be, paid when received in Irish.’
Agus dúirt siad:
‘Gealladh dúinn billí i nGaeilge roimhe seo, fuair muid trí Ghaeilge iad roimhe seo, agus mar sin féin, tá an féidearthacht agaibh fós iad a sheoladh trí Ghaeilge.
‘Mar atá ráite againn ó bhí 2022 ann, íocfar Uisce Éireann agus bille curtha chugainn trí Ghaeilge.’
Athraíodh an t-ainm ‘Irish Water’ go ‘Uisce Éireann’ ag deireadh mhí na Nollag 2022.
Mar sin, mura bhfuil na litreacha ar fad atá á gcur acu chuig Conradh na Gaeilge, i nGaeilge, is cosúil nach raibh i gceist leis an athrú ainm ó ‘Irish Water’ go Uisce Éireann ach athrú in ainm amháin.
Chuaigh ExtraG.ie i dteagmháil le hUisce Éireann i nGaeilge agus i mBéarla chun freagra a fháil ar an scéal seo agus is é seo a fuaireamar:
‘Uisce Éireann is committed to supporting customers who wish to communicate with us through Irish. This includes issuing a bill in Irish on request. In addition, where a member of the public communicates with Uisce Éireann in Irish, by email, by letter, or via social media, we provide a reply to that person in Irish.
‘In relation to the matter referenced below, our customer team have investigated the issue and can confirm the original bill was sent in Irish. We are contacting the customer to support them and will reissue the original bill to the customer should they wish.‘
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
