Tá siopadóirí ag déileáil le ganntanas glasraí agus praghsanna an-ard i siopaí mar gheall ar an drochaimsir sa Spáinn agus i Maracó.
Tá bianna bunúsacha cosúil le leitís agus trátaí gann agus in áiteanna áirithe tá ardú 200% tagtha ar phraghas na dtrátaí.
Bhí ar shiopa Tesco agus siopa Dunnes Stores i mBaile Átha Cliath nótaí a chur suas ar na seilfeanna ag gabháil leithscéil faoin bhfadhb.
Thug an nóta ó Tesco foláireamh: ‘Tá drochaimsir sa Spáinn agus i Maracó ag cur isteach ar sholáthar cuid dár dtáirgí úra go sealadach. ‘
Dúirt urlabhraí do Retail Ireland, a dhéanann ionadaíocht ar an tionscal: ‘Chuir drochaimsir i gcodanna den Eoraip agus san Afraic isteach ar sholáthar táirgí áirithe, torthaí agus glasraí, do roinnt siopaí Éireannacha.
‘Tá ganntanas roinnt táirgí mar thoradh air seo. Tá miondíoltóirí ag obair go gníomhach lena soláthróirí chun na deacrachtaí seo a shárú, lena n-áirítear féachaint ar fhoinsí eile soláthair nuair is féidir.’
Chuir siopa Dunnes i mBaile Átha Cliath nóta suas ag gabháil a leithscéal do chustaiméirí agus ag rá: ‘Mar gheall ar aimsir fhuar neamhshéasúrach sa Spáinn, níl mórán dár línte táirgí úra againn.’
Bíonn go leor áiteanna ó thuaidh den mhór-roinn ag brath ar sholáthairtí glasraí ó na réigiúin is teo sa Spáinn agus i dtuaisceart na hAfraice sa gheimhreadh.
Mar gheall ar ardú costas gháis is fadhb ollmhór é costas tithe gloine a théamh sa gheimhreadh freisin.
Mar gheall ar na fadhbanna tá ardú tagtha ar phraghas roinnt torthaí agus glasraí, dar le Justin Leonard ó Leonard & Sons, an comhlacht táirgí úra is sine i mBaile Átha Cliath.
Dúirt sé ar Breakfast Business ar Newstalk go bhfuil táirgí cosúil le trátaí, cúcamair, leitís ‘iceberg’, cóilis agus brocailí ar fad i mbaol gan a bheith ar fáil agus arduithe praghais.
‘Tá praghsanna tosaithe ag ardú cheana féin. Tá siad ag ardú le trí nó ceithre seachtaine anuas ach an tseachtain seo, tá na praghsanna as an radar. Tá mé 36 bliain sa ghnó agus ní fhaca mé praghas ag dul chomh hard sin ar an oiread sin táirgí.
‘Tá méadú 300% feicthe againn ar piobar, tá méadú 200% ar trátaí, tá sé mar an gcéanna le gach táirge.’
Agus dúirt sé go mbeidh ar na siopadóirí íoc as.
Dúirt sé freisin: ‘Bialanna, caiféanna, do shiopa cúinne áitiúil, ar an drochuair, beidh praghsanna ag dul in airde agus níl ansin ach fíoras an tsaoil.’
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
