Foláireamh: Uisce le múchadh, mar gheall ar obair ar sholáthar do 350,000 teach i mBaile Átha Cliath

Gearrfar soláthar uisce tithe ar fud thuaisceart Bhaile Átha Cliath an deireadh seachtain seo chugainn mar thoradh ar obair Uisce Éireann agus Comhairle Contae Fhine Gall.

Beidh tionchar ag teaghlaigh a bhfuil cónaí orthu sna ceantair seo a leanas:

• Baile Bochal (Ballyboughal),
• Domhnach Bat (Donabate),

• Cionn Sáile (Kinsealy),
• Halla an Leasa (Lissenhall),
• Loch Sionnach (Loughshinny),
• Lusca (Lusk),
• Mullach Íde (Malahide),
• Baile Phámar (Palmerstown, Fine Gall),
• Port Mearnóg (Portmarnock),
• Port Reachrann (Portrane),
• Seantrabh (Santry),
• Sord (Swords),
• Turvey
• stáisiúin seirbhíse ar an M1 agus na ceantair máguaird (surrounding areas).

Cuirfear tús leis an obair uair tar éis meán oíche Dé Sathairn, 25 Feabhra, agus leanfaidh sé ar aghaidh go dtí thart ar 11am Dé Domhnaigh, a dúirt an comhlacht.

Dúirt Uisce Éireann, áfach: ‘Tá sé beartaithe go dtosóidh an soláthar ar ais tar éis an ama seo. Mar sin féin, mar gheall ar mhéid na bpíopaí agus an ghréasáin, áfach, d’fhéadfadh sé suas le 10 n-uaire an chloig a ghlacadh chun gnáthsholáthar a thabhairt ar ais do na custaiméirí go léir.’

Tá stáisiúin soláthair uisce bunaithe ag Uisce Éireann agus ag Comhairle Contae Fhine Gall sna láithreacha seo a leanas:

• Eaglais Chaitliceach an Chroí Ró-Naofa n(Sacred Heart), Mullach Íde (Malahide)

• Carrchlós Ionad Pobail Dhomhnach Bat/Port Reachrann (Donabate/Portrane)

• Club Spóirt agus Fóillíochta Phort Mearnóg (Portmarnock)

• Carrchlós Pháirc an Ráth Mhór (Rathmore ) i Lusca (Lusk)

• Carrchlós Pháirc Radharc na Mara (Seaview) i bPort Reachrann (Portrane)

• Clubanna CLG Naomh Colmcille i Sord (Swords) Thuaidh

• Eaglais Chaitliceach Naomh Fhionán i Sord Theas

• Ionad Siopadóireachta Tesco, an Ros (Rush)

Tá rabhadh tugtha do theaghlaigh a gcoimeádáin (containers) féin a úsáid agus iad ag fáil uisce ó na stáisiúin seo agus tá sé tugtha le fios ag an HSE gur cheart an t-uisce a fhiuchadh sula n-óltar é.

I ndiaidh an chineáil oibre seo d’fhéadfadh fadhbanna  a bheith ann mar uisce dorcha nó ‘airlocks’. Is féidir le custaiméirí comhairle a fháil ar conas na fadhbanna sin a réiteach ar shuíomh Gréasáin Uisce Éireann nó ar an líne chabhrach 24/7 ar 1800 278 278, a deir an comhlacht.

Dúirt Uisce Éireann gurb é an chúis atá leis an gcur isteach ar an soláthar uisce ná go bhfuil siad ag cur píopaí nua isteach.

Dúradh go bhfuil píblíne nua idir Sord agus Taiscumar Bhaile Uí Chúlainn (Ballycoolin Reservoir) le tógáil, agus táthar ag súil go gcinnteoidh sé soláthar uisce níos iontaofa.

Dúirt William McKnight ó Uisce Éireann go gcuirfidh an tionscadal le soláthar uisce óil sa cheantar.

Dúirt sé go n-úsáidtear beagnach gach braon uisce a tháirgtear gach lá i mBaile Átha Cliath agus i mórcheantar Bhaile Átha Cliath.

Dúirt sé go gcuideoidh an tionscadal seo in éineacht le roinnt eile sa cheantar le slándáil an tsoláthair uisce óil a mhéadú agus go soláthróidh sé an bonneagar chun tacú le tithe agus le scoileanna nua.