Táthar ag súil go mbeidh níos mó laghduithe cánach ioncaim mar chuid den chéad dá bhuiséad eile den Rialtas seo.
Tá sé ráite ag an Taoiseach Leo Varadkar go bhfuil fonn air athruithe polasaí a dhéanamh le cinntiú go mbeidh daoine in ann suas le €50,000 a thuilleamh in aghaidh na bliana gan an ráta is airde cánach ioncaim a íoc.
Dúirt an Taoiseach nach bhfuil sé faoi cheangal banda cánach 30% a thabhairt isteach chun cabhrú le daoine atá ag tuilleamh meánioncaim, smaoineamh ar bhog sé i mí an Mhárta.
Dúirt an tUasal Varadkar nach bhfuil aon fhadhb aige é a bhaint amach trí an ráta chaighdeánaigh a mhéadú ina ionad sin.
Dúirt an Taoiseach nuacheaptha, áfach, gur cinneadh don Chomh-Aireacht le chéile a bheadh ann.
Níos luaithe i mbliana, chuimsigh páipéir an Ghrúpa Straitéise Cánach (Tax Strategy Group ) an ráta cánach ioncaim 30% molta ina anailís agus fuarthas amach go bhféadfadh milliún duine suas le €1,000 sa bhliain a choigilt dá dtabharfaí isteach é.
De réir na bpáipéar, dá dtabharfaí isteach banda 30% chun ioncam idir €36,800 agus €46,800 a chlúdach, bheadh coigilt cánach de €1,000 sa bhliain mar thoradh air do cháiníocóirí aonair.
Measann an Roinn Airgeadais go gcosnódh beart den sórt sin €820 milliún ar an Státchiste sa chéad bhliain agus €945 milliún gach bliain ina dhiaidh sin.
Creidtear go mbainfeadh 35% den daonra a íocann cánach leas as.
Tá rogha eile, níos teoranta, leagtha amach sna páipéir freisin, a d’fhágfadh go mbeadh ráta nua 30% i bhfeidhm ar ioncaim idir €36,800 agus €41,800.
Bheadh luach €500 sa bhliain níos fearr ar dhuine aonair nó ar lánúin phósta. Bheadh costas €460 milliún ar an rogha seo sa chéad bhliain agus €525 milliún gach bliain ina dhiaidh sin.
Roimh an mBuiséad deiridh, d’íoc aon duine singil a thuilleann suas le €36,800 sa bhliain cáin ioncaim ag an mbunráta 20%, agus gearradh cáin ar aon ioncam bliantúil os cionn sin ag 40%.
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
