Ról lárnach á thabhairt dár dteanga in Ollscoil Mhá Nuad

Tá díograis mhór don teanga in áiteanna ar nós Ollscoil Mhá Nuad agus, ar ndóigh, Ollscoil na Banríona, Béal Feirste.

Sheol an tUachtarán Catherine Connolly tuarascáil nua taighde faoi staid na Gaeilge in Ollscoil Mhá Nuad, tamall gairid ó shin, agus taispeánann sé cuid de na hathruithe móra atá ag tarlú lenár dteanga.

Bhí tráth ann nuair a cheap mic léinn na Gaeilge gurbh iad Ollscoil na Gaillimhe agus Ollscoil Chathair Bhaile Átha Cliath na háiteanna le dul.

Ach tá athruithe móra tarlaithe le tamall anuas.

Tá díograis mhór don teanga in áiteanna ar nós Ollscoil Mhá Nuad agus, ar ndóigh, Ollscoil na Banríona, Béal Feirste.

Agus an staidéar mór nua á sheoladh aici ó Ollscoil Mhá Nuad, dúirt an tUachtarán Connolly: ‘Is léir ón tuarascáil seo go bhfuil dea-thoil anseo san Ollscoil i leith na Gaeilge ach go bhfuil dúshláin phraiticiúla roimpi freisin.

‘Sin ráite, tá ábhar dóchais sna moltaí ar fad a d’eascair ón suirbhé a comhlíonadh.  Moltaí, nuair a bheidh siad curtha i bhfeidhm, a rachaidh chun leas agus tairbhe na teanga.’

Anailís chuimsitheach atá sa tuarascáil, Ár gCampas, Ár dTeanga, ar an inniúlacht sa Ghaeilge, ar úsáid na Gaeilge agus ar dhearcthaí i leith na teanga i measc mhic léinn agus bhaill foirne uile in Ollscoil Mhá Nuad.

Breis is 3,000 duine a ghlac páirt sa taighde agus tugann na torthaí le fios go bhfuil dea-thoil an-láidir i leith na Gaeilge i measc phobal na hOllscoile.

I measc phríomhthorthaí an taighde ó na daoine a d’fhreagair an suirbhé in Ollscoil Mhá Nuad, tá na pointí seo a leanas:

• Creideann 90% den 3,329 mac léinn agus ball foirne gur cheart an Ghaeilge a chur chun cinn ar an gcampas.
• Thuairiscigh 30% de na mic léinn agus beagnach 19% den fhoireann  go bhfuil cumas B2 (meánleibhéal ard) ar a laghad acu sa Ghaeilge labhartha.
• Dúirt níos mó ná 50% díobh siúd a bhfuil an Ghaeilge ar a dtoil acu, áfach, nach n-úsáideann siad an teanga ar an gcampas ach go hannamh nó riamh.
• Léirigh 85% den fhoireann agus 82% de na mic léinn gur mhaith leo a gcuid Gaeilge a fheabhsú ach go gcuireann an easpa ama agus an easpa aitheantais bac orthu.
• Dúirt 50% de na mic léinn go mbainfidís úsáid as seirbhísí Gaeilge dá mbeidís ar fáil, agus léirigh 45% den fhoireann spéis an Ghaeilge a úsáid ina gcuid oibre.

Leagtar amach sa tuarascáil 25 cinn de mholtaí praiticiúla chun tacú leis an bpleanáil teanga in Ollscoil Mhá Nuad.

Baineann na moltaí sin le réimsí éagsúla gníomhartha, ina measc, cur le feiceálacht na Gaeilge agus ‘tearmainn teanga’  ar an gcampas, cur leis na deiseanna foghlama Gaeilge, píolótú a dhéanamh ar sheirbhísí áirithe, agus na struchtúir agus acmhainní cuí a chur ar fáil.

Scéalta Gaeilge ExtraG.ie
ar fáil ar ríomhphost (email)

• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com

• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.

• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie

Cliceáil ar cheann de na lógónna chun an stáisiún teilifíse agus na stáisiúin raidió Gaeilge a fháil