Tá deacrachtaí móra fós ag Fórsaí Cosanta na hÉireann mná a mhealladh isteach, cé gur caitheadh beagnach €2 mhilliún ar fhógraí tarraingteacha agus ar fheachtais sna meáin shóisialta.
Ó Mhí Iúil anuraidh i leith, caitheadh €1.987 milliún ar iarrachtaí earcaíochta, ach is fir a bhí i bhfad an chuid is mó de na hiarratasóirí, dar leis an Irish Examiner.
As 12,942 iarratas chun dul isteach sna céimeanna liostaithe sna Fórsaí Cosanta, ní raibh ach 1,751 acu ó mhná – i gcomparáid le 11,191 ó fhir. Is é sin thart ar sé fhear ar gach bean amháin.
Bhí an scéal cosúil do phoist oifigigh. As 2,203 iarratas, tháinig 1,895 ó fhir agus 308 ó mhná.
Tá fadhbanna earcaíochta ag Fórsaí Cosanta le fada an lá.
Faoi dheireadh Aibreáin na bliana seo, ní raibh ach 7,500 san fhórsa buan – síos ó thart ar 9,500 i 2010.
Tá na huimhreacha na Fórsaí Cosanta ag titim le cúig bliana déag anuas, cé gur cosúil go bhfuil siad ag cothromú anois.
D’fhonn an treo a athrú, chaith an t-arm €1.91 milliún ar fhógraíocht dhigiteach agus lasmuigh – dírithe ar dhaoine óga ar ardáin cosúil le TikTok, Snapchat agus Twitch.
Chaitheadar beagnach €720,000 ar fhógraí ar líne do na Fórsaí Cosanta, YouTube san áireamh, agus €183,000 ar Facebook.
Chosain cláir fógraíochta ar bhallaí agus i spásanna poiblí €360,691.
Fuair Snapchat €75,000, TikTok €79,057, agus Twitch – a bhfuil tóir air i measc ‘gamers’ – €23,018. Níor caitheadh ach €50,000 ar na meáin chlóite.
Chosain fógraí sna pictiúrlanna do na Fórsaí Cosanta €49,000, agus tháinig feachtais raidió agus teilifíse ar €197,000 agus €179,000 faoi seach. Chaith siad €71,000 eile ar chruthú ábhair do na feachtais éagsúla.
In ainneoin an chaiteachais mhóir, tá an bhearna inscne fós an-soiléir.
Dúirt urlabhraí ó Fhórsaí Cosanta leis an Irish Examiner:
‘Tá Óglaigh na hÉireann tiomanta na hiarrthóirí is fearr a earcú chun freastal ar an stát.
‘Tá ár n-iarrachtaí fógraíochta agus caidreamh poiblí ríthábhachtach chun daoine ar ardchaighdeán a mhealladh – daoine a bhfuil na luachanna, na scileanna agus an dílseacht riachtanach acu don tseirbhís mhíleata.
‘Cinntíonn an infheistíocht seo go mbeidh fórsa láidir, cumasach agus gairmiúil againn, réidh le freastal ar riachtanais an náisiúin agus cosaint a thabhairt don stát.’
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
