An gcloisfimid Gaeilge á labhairt i gcúirt i Londain i mí Lúnasa, nuair a bheidh ball de Kneecap, Mo Chara, ann.
Tá cúiseamh sceimhlitheoireachta (terrorism) os a chomhair, ina gcuirtear ina leith gur chroith sé bratach Hezbollah.
Bhí tagairt do Ghaeilge sa chúirt Dé Céadaoin agus seans go mbeidh an saol ag déanamh aithris ar an ealaín, tar éis comharthaí go bhféadfadh ateangaire (interpreter) Gaeilge a bheith ag teastáil uathu.
Thar aon rud eile, bhí cuma gig Kneecap ar na himeachtaí, taobh istigh agus taobh amuigh de Chúirt Mhaighistir Westminster.
Bhí sluaite ann, ag gáire – guthanna arda ag tacú le muintir na Palaistíne atá ag fulaingt i nGaza – agus ceol.
Bhí ceoltóirí sráide i measc na gcéadta tacaí a tháinig, agus choinnigh siad giúmar na féile le hamhráin ar nós Crazy World, de chuid Aslan, agus Fisherman’s Blues de chuid na Waterboys.
Bhí Paul Weller ann freisin.
Tá Mo Chara, atá 27 bliain d’aois, arb é Liam Ó hAnnaidh a ainm fíor, cúisithe as an bhratach Hezbollah a thaispeáint le linn ceolchoirme ag an O2 Foram i Kentish Town ar 21 Samhain, anuraidh.
Líomhnaítear freisin gur scairt se, ‘suas le Hamas, suas le Hezbollah’ le linn an ghig céanna, inar dhearbhaigh Kneecap a bhfreasúra in aghaidh ionsaithe Iosrael ar Gaza.
Le linn na héisteachta, tugadh le fios gurbh fhéidir go mbeadh ateangaire Gaeilge ag teastáil uathu nuair a thiocfadh an cás aníos arís, agus dúirt an breitheamh: ‘Má tá aithne ag aon duine ar cheann!’
Ag an bpointe sin, níorbh fhéidir le ball de Kneecap, Móglaí Bap, arb é Naoise Ó Cairealláin a ainm fíor, gan gáire a dhéanamh agus baill den lucht féachana ag smaoineamh an ndéanfadh an tríú ball den bhanna – DJ Próvaí – an jab.
Tar éis an tsaoil, sa scannán Kneecap, sin mar a tháinig an grúpa le chéile.
Tugadh DJ Próvaí isteach mar ateangaire ag na póilíní tar éis do Móglaí Bap ceisteanna a fhreagairt i nGaeilge.
Sa chúirt freisin dúirt an t-ionchúisitheoir Michael Bisgrove: ‘Ní bhaineann an cás seo le tacaíocht an Uasail hAnnaidh do mhuintir na Palaistíne ná lena cháineadh ar Iosrael.’
Mar sin féin, níor aontaigh na céadta lasmuigh den chúirt leis sin.
Bhailigh siad lasmuigh den fhoirgneamh cúirte go moch ar maidin, agus fógraí á n-iompar acu ag rá, ‘Free Mo Chara’ agus ‘Defend Kneecap’.
Bhí meascán de bhrataacha Palaistíneacha agus Kneecap á n-iompar ag cuid den slua, agus chualathas gártha tar éis do veain fógraíochta tiomáint thart a raibh an mana ‘Níos Mó Daoine Gorma, Níos Mó Madraí, Níos Mó Éireannach, Mo Chara’ á thaispeáint.
Bhí póstaeir agus léinte-T á gcaitheamh ag go leor acu ag tacú le saoirse cainte ar an bPalaistín.
Níor labhair Mo Chara ach chun a ainm a dheimhniú ag tús na n-imeachtaí.
Deonaíodh bannaí neamhchoinníollacha (unconditional bail) dó agus tá sé sceidealaithe filleadh ar an gcúirt ar 20 Lúnasa, nuair a bheidh argóintí dlí ann.
D’inis an breitheamh Paul Goldspring dó go bhfuil sé éigeantach freastal ar an gcéad éisteacht eile.
Tar éis na héisteachta gearr, fuair Mo Chara babhta bualadh bos agus é ag fágáil an tseomra cúirte.
Chonacthas é ag dul isteach i seomra taobh le haghaidh plé lena fhoireann dlí sular fhág sé an foirgneamh.
Go gairid ina dhiaidh sin, d’fhág triúr ball de Kneecap, Liam Óg Ó hAnnaidh, Naoise Ó Cairealláin, agus JJ Ó Dochartaigh, Cúirt Mhaighistir Westminster le glórtha agus cantaireacht ‘Saor an Phalaistín’ ó shlua mór tacaíochta.
Scéalta Gaeilge ExtraG.ie
ar fáil ar ríomhphost (email)
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
