Tá foláireamh tugtha ag Michael O’Leary go bhfuil an Eoraip ag tabhairt aghaidh ar an ‘méadú is mó riamh ar tháillí aeir’ sa bhliain atá romhainn, de réir mar a leanann an choimhlint sa Mheánoirthear de phraghsanna a ardú.

Tá sé tugtha le fios ag Príomhfheidhmeannach Ryanair go bhféadfadh iallach a bheith ar a aerlíne féin, chomh maith le haerlínte eile, a gcuid táillí a ardú de réir mar a éiríonn breosla eitlíochta níos costasaí.

Tá tionchar mór ag an gcogadh san Iaráin ar thionscal na heitlíochta le míonna beaga anuas, agus dúnadh Chaolas Hormuz ag cur brú suntasach i gcónaí ar sholáthar domhanda ola.

Anois, tá foláireamh tugtha ag an Uasal O’Leary go bhféadfadh táillí aeir ardú chomh mór le 20% mura dtosaíonn praghsanna ceirisín ag titim go luath.

Dúirt sé: “Feicfidh muid an méadú is mó riamh ar tháillí aeir san Eoraip, déarfainn, sna 12 mhí atá romhainn.

“Is í an cheist ná an leor an méadú sin ar tháillí aeir chun na billí ola atá i bhfad níos airde a chlúdach. Ní dóigh liom go mbeidh sé sách mór… Tá formhór na n-aerlínte Eorpacha eile sa riocht céanna.”

Díreach ina dhiaidh sin, thit praghas scaireanna Ryanair go géar, thart ar 2%. Tá an aerlíne ag súil cheana féin le dhá mhilliún paisinéir níos lú a iompar sa bhliain airgeadais seo tar éis di a hacmhainn eitilte a laghdú.

De réir an Express, rinneadh an cinneadh sin chun suas le £84 milliún a shábháil ar ídiú breosla.

Mar sin féin, chuir O’Leary béim ar an bpointe, fiú dá dtiocfadh deireadh leis an gcoimhlint san Iaráin amárach, go leanfadh tionscal na heitlíochta de bheith ag tabhairt aghaidh ar “dhúshlán ollmhór costais”.

Tagann an méid seo i ndiaidh fhógra Ryanair le déanaí go bhfuil athrú mór á dhéanamh aige ar an gcaoi a n-oibríonn a dheasca seiceála isteach ag aerfoirt ar fud na hEorpa.

Ón 10 Samhain ar aghaidh, tá paisinéirí á gcur ar an eolas nach ndúnfaidh deasca seiceála isteach Ryanair 40 nóiméad roimh imeacht na heitilte a thuilleadh. Ina ionad sin, dúnfar iad uair an chloig roimh dhul ar bord.

Tá sé ráite ag an aerlíne go dtabharfaidh an t-athrú seo “níos mó ama do phaisinéirí dul tríd an tslándáil”.

Mar sin féin, ba cheart a thabhairt faoi deara gur dóichí nach mbeidh tionchar ag na rialacha nua ach ar phaisinéirí atá ag seiceáil isteach mála nó cás taistil agus a gcaithfidh úsáid a bhaint as an deasc seiceála isteach.

Ní dócha go mbeidh aon tionchar ag an athrú ar dhaoine atá ag taisteal le bagáiste láimhe amháin, ós rud é gur féidir leo seiceáil isteach dá n-eitiltí ar líne.