Léirmheas: Na Doirse, scannán 9.5 nóiméad le Mary Tynan: Deirtear gur gaire cabhair Dé ná an doras, ach faraor, ní mar sin a bhíonn i gcónaí.
Seo scéal fé bhean a úsáideann cathaoir rotha, go bhfuil tinneas néareolaíoch uirthi, agus na constaicí a bhíonn ina bealach agus í ag iarraidh a saol a chaitheamh.
Aisteoir amháin (Mary Tynan) a insíonn an scéal don gceamara, agus is cur chuige ana-shímplí – ach an-éifeachtach – é seo.
Labhraíonn an carachtar ón gcroí amach, is faighimid léargas ar a bhfuil ag goilliúint uirthi.
Léiríonn Mary a cumas agus a hildánacht mar aisteoir – tá idir dhiongbháilteacht is leochaileacht sa charachtar, tréithe a théann i bhfeidhm ar an lucht féachana.
Aisteoir, scríbhneoir, is stiúrthóir í Mary Tynan a bhunaigh an t-ionad ealaíon ar líne, Notes from Xanadu, le linn na paindéime.
Saolaíodh i Londain í, ach d’aistrigh sí lena muintir go Gaillimh agus í ina cailín óg.
Léiritheoir, scríbhneoir is eagarthóir is ea Seán Breathnach, agus tá duaiseanna éagsúla buaite aige as a chuid scannán.
Seoladh Na Doirse i nGaelscoil Mhic Amhlaigh i gCnoc na Cathrach, Cathair na Gaillimhe i mBealtaine na bliana so, mar a raibh slua breá i láthair.
Reáchtáladh seisiún ceisteanna is freagraí i ndiaidh an taispeántais, nuair a chuir Barbara Nic Dhonnacha agallamh ar Mhary is ar Sheán.
Ag leanúint ar aghaidh ó lainseáil Na Doirse, tá an scannán ar fáil ar líne anois agus is maith an ní é go mbeidh teacht ag lear mór daoine air.
Is scannán ana-chumhachtach é Na Doirse, a chuirfidh go mór leis an tuiscint atá ag an bpobal ar thinneas dofheicthe, dar liom, is tá ana-chreidiúint ag dul do Mhary Tynan is do Sheán Breathnach dá bharr san.
Ní minic a phléitear easláinte nó míchumas i slí atá chomh macánta leis seo, ach amháin b’fhéidir i leithéid, Unrest, an scannán faisnéise fé ME/CFS le Jennifer Brea (2017).
Músclóidh Na Doirse idir chomhthuiscint is chomhbhá sa lucht féachana, tá súil agam, is n’fheadair éinne cén doras a d’osclófaí san am atá le teacht.
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
