Beidh ar a laghad bean amháin Éireannach san iomaíocht don Tour de France Femmes, a thosóidh ar an Satharn, agus beidh gach céim le feiceáil beo ar TG4.
Deimhníodh Dé Luain go bhfuil Mia Griffin as Cill Chainnigh, curadh náisiúnta na hÉireann, chun tabhairt faoin Tour den chéad uair.
Beidh Mia, atá 26 bliain d’aois, ag rothaíocht le foireann na hEilvéise, Roland Le Dévoluy.
Is í an chéad bhean Éireannach í atá fógartha go hoifigiúil don rás.
Craolfar gach céim de Tour de France Femmes avec Zwift beo ar TG4 thar naoi lá, agus é ag teacht ó gach cearn den Fhrainc.
Cuirfear tús leis an gclúdach Dé Sathairn, leis an gcéad chéim 78km ó Vannes go Plumelec sa Bhriotáin.
| Lá & Dáta | Céim | Cúrsa | Tús craolta | Deireadh craolta | Ardán |
| Dé Sathairn 26/07 | 1 | Vannes > Plumelec | 16:15 | 18:45 | TG4 Beo |
| Dé Domhnaigh 27/07 | 2 | Brest > Quimper | 12:00:00 | 14:30:30 | TG4 Beo |
| Dé Luain 28/07 | 3 | La Gacilly > Angers | 14:35:00 | 17:05:30 | TG4 Beo |
| Dé Máirt 29/07 | 4 | Saumur > Poitiers | 14:35 | 17:05 | TG4 Beo |
| Dé Céadaoin 30/07 | 5 | Jaunay-Marigny Futuroscope > Gueret | 14:35 | 17:05 | TG4 Beo |
| Déardaoin 01/08 | 6 | Clermont-Ferrand > Ambert | 14:35 | 17:05 | TG4 Beo |
| Dé hAoine 01/08 | 7 | Bourg En Bresse > Chambery | 14:35 | 16:37 | TG4 Beo |
| Dé Sathairn 02/08 | 8 | Chambéry > Saint François Longchamp – Col de la Madeleine | 12:40 | 16:50 | Beo Aip TG4 & Seinnteoir |
| Dé Domhnaigh 03/08 | 9 | Praz-sur-Arly > Châtel | 14:15 | 18:20 | Beo Aip TG4 & Seinnteoir |
Leanfar leis an gclúdach go dtí go mbainfidh siad an chéim dheireanach amach i Châtel Les Portes du Soleil in Alpa na Fraince Dé Domhnaigh an 3 Lúnasa.
Seo í an ceathrú bliain den leagan nua-aimseartha seo den Tour de France Femmes, a thosaigh in 2022, agus tá sé anois ar cheann de na hócáidí is mó le rá i bhféilire rothaíochta na mban.
Beidh trí chéim chothroma, dhá chéim sna cnoic, agus ceithre chéim sna sléibhte i gceist i mbliana, lena n-áirítear an dreapadh dian suas Col de la Madeleine, atá 2,000m ar airde, a bheidh le déanamh acu lá roimh an gcríoch mhór.
Beidh tráchtaireacht bheo, leis an nGaeilge dár ndóigh, á cur ar fáil arís i mbliana ag Páidí Ó Lionáird agus Pádraic Ó Cuinn, agus jab iontach déanta acu le Tour de France na bhfear.
Beidh buaicphointí ó gach céim le feiceáil gach oíche ar TG4 freisin.
Is féidir gach eolas a fháil faoin rás agus faoin mbealach a bheidh an rás ag dul a fháil ar shuíomh gréasáin oifigiúil an imeachta: CLICEÁIL ANSEO
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
