Ghabh fórsaí Iosrael an ‘Freedom Flotilla’ a bhí ag tabhairt cúnaimh go Gaza tar éis bagairt ó aire cosanta Iosrael.
Chuaigh fórsaí Iosrael ar bord an Madleen tar éis ionsaí a dhéanamh.
Chonacthas na hoibrithe deonacha a bhí ar bord lena lámha san aer tar éis d’fhórsaí Iosrael ionsaí a dhéanamh orthu, agus ansin ghabh siad iad.
Bhí an long charthanachta, agus an feachtasóir Greta Thunberg ar bord, ag ardú feasachta faoi chruachás na milliún duine atá ag fáil bháis den ocras i nGaza, agus rialtais an Iarthair ag soláthar airm d’Iosrael.
Dúirt agóideoirí go raibh an Madleen suite in uisce idirnáisiúnta agus nach raibh aon dlínse ag Iosrael ar chor ar bith iad a ghabháil agus gur Long Briotanach í.
Dúirt an aire le fórsaí Iosrel ‘gach beart is gá a dhéanamh’ chun cosc a chur an ‘Freedom Flotilla’.
Mar sin féin, dúirt an Tánaiste agus an tAire Gnóthaí Eachtracha Simon Harris ar X go mbeadh aon úsáid fórsa i gcoinne an ‘Freedom Flotilla’, an Madleen, ina ‘sárú ar an dlí idirnáisiúnta’.
Is bád é an Madleen a bhí á oibriú ag an ngrúpa gníomhaithe Freedom Flotilla Coalition (FFC).
D’fhreastail roinnt Éireannach ar an seoladh a léirigh a dtacaíocht don mhisean, lena n-áirítear an gníomhaí Caoimhe Butterly, an t-aisteoir Liam Cunningham agus an Seanadóir Lynn Ruane.
Bhí sé ag iarraidh teacht ar chladaí Gaza chun méid siombalach cúnaimh a thabhairt isteach agus feasacht idirnáisiúnta a mhúscailt faoin ngéarchéim dhaonnúil leanúnach, agus go leor rialtais an iarthair fós ag tacú le míleata Iosrael agus á armáil.
Ag baint úsáide as focail a úsáideann lucht tacaíochta ionsaithe Iosrael ar shibhialtaigh Phalaistíneacha i nGaza go rialta, thug an tAire Cosanta Iosrael, Israel Katz, ‘flotilla fuatha’ ar an Madleen, agus ghlaoigh sé ‘frith-Sheimíteach’ ar na daoine ar mian leo cabhrú le muintir ocrach Ghaza.
Bíonn polaiteoirí Iosraelacha ag glaoch ‘frith-Sheimíteach’ ar bhaill rialtas na hÉireann agus ar gach duine eile a cháineann an t-ionsaí ar thithe teaghlaigh agus ospidéil i nGaza.
Ag freagairt don ordú Iosraelach an bád a bhac, dúirt an Freedom Flotilla Coalition (FFC), a oibríonn an Madleen, go raibh an tAire Cosanta ‘ag iarraidh foréigean a chosaint’.
D’ordaigh an tAire Katz don mhíleata Iosraelach an long a stopadh ó dhul in aice le Gaza.
‘Thug mé treoir don IDF [Óglaigh Chosanta Iosrael] gníomhú ionas nach sroichfidh an flotilla fuatha … cladaí Ghaza – agus gach beart is gá a dhéanamh chuige sin,’ a dúirt Katz i ráiteas.
‘Le Greta [Thunberg] frith-Sheimíteach agus a cairde a dhéanann macalla de bholscaireacht Hamas, deirim go soiléir: Is fearr daoibh filleadh ar ais – mar ní shroichfidh sibh Gaza.
‘Gníomhóidh Iosrael i gcoinne aon iarrachta an bac a bhriseadh nó cabhrú le heagraíochtaí sceimhlitheoireachta – ar muir, san aer, agus ar tír.’
Mar sin féin, dúirt an Tánaiste ar X go mbeadh aon úsáid fórsa i gcoinne an Madleen ‘ina sárú ar an dlí idirnáisiúnta’.
Dúirt sé: ‘Is iarracht shibhialta neamharmtha í chun maitheas a dhéanamh i measc an léirscriosta agus na ndálaí daonnúla tubaisteacha.
‘Is iarracht dochreidte í an Madleen chun bia agus leigheas a thabhairt do mhuintir ocrach Gaza.’
Dúirt Ms Thunberg go raibh sí ag glacadh páirte sa mhisean ‘mar an nóiméad a stopann muid ag iarraidh is ea a chaillimid ár ndaonnacht’.
Dhiúltaigh sí féin agus na milliúin agóideoirí do na líomhaintí frith-Sheimíteachais.
Ar bord na loinge in éineacht léi bhí 10 ngníomhaí eile ón nGearmáin, ón bhFrainc, ón mBrasaíl, ón Tuirc, ón tSualainn, ón Spáinn agus ón Ísiltír.
Ina measc bhí Rima Hassan, ball Francach de Pharlaimint na hEorpa de shliocht Palaistíneach a bhfuil cosc uirthi dul isteach in Iosrael.
Ag freagairt do Katz Dé Domhnaigh, dúirt siad: ‘Is sampla eile é ráiteas aire cosanta Iosrael d’Iosrael ag bagairt úsáid mhídhleathach fórsa i gcoinne sibhialtach – agus ag iarraidh an foréigean sin a chosaint.
‘Ní chuirfear eagla orainn,’ a dúirt siad. ‘Tá an domhan ag faire.’
D’fhág an Madleen calafort Catania sa tSicil, i ndeisceart na hIodáile, ar an 1 Meitheamh, thart ar 160 míle farraige ó Gaza.
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
