Tá lucht freastail ceolchoirmeacha in Éirinn ag íoc táillí breise nach bhfuil soiléir go minic, agus tá sé seo ag cruthú costais bhreise ar luach na milliún euro gach bliain.
I measc na n-ionad is gnóthaí, tá an 3Arena i gceantar na ndugaí i mBaile Átha Cliath.
Cuireann an 3Arena táille €2 ar gach ticéad ar a dtugtar ‘táille áise’.
Níl an táille sin le feiceáil ar rannóg na dticéad ar shuíomh gréasáin an ionaid féin, agus ní fheiceann an custaiméir é go dtí go sroicheann siad an ‘seiceáil amach’ ar shuíomh Ticketmaster.
Thosaigh an táille seo i 2016, ach ag an am sin ní raibh sé ach €1.
Anois, tá sé dúbailte, ach níor thug urlabhraí ón gcuideachta míniú ar cén uair a tharla an méadú.
Tá an 3Arena faoi úinéireacht Live Nation, an chuideachta chéanna a bhfuil Ticketmaster ina seilbh aici freisin.
D’fhreastail níos mó ná milliún duine ar an 3Arena anuraidh agus tháinig €71.4 milliún isteach ó dhíolachán ticéad.
Dúirt an Teachta Dála ó Fhianna Fáil, Shay Brennan: ‘Tá sé ceadaithe d’amharclanna a gcuid praghsanna féin a leagan síos, ach caithfear a bheith soiléir leis na custaiméirí ó thús maidir le cé mhéad atá le híoc ina iomláine agus cén fáth go mbíonn táillí breise i bhfeidhm.’
Thug sé le fios nach bhfuil sé inghlactha do ghnó ar bith táillí ceilte a ghearradh ná custaiméirí a mhealladh le costais bhreise i ngan fhios dóibh.
Tá táille bhreise €2 le feiceáil freisin nuair a cheannaíonn duine ticéid don Ambassador Theatre ar Shráid Uí Chonaill, cé nach luaitear é ar a suíomh gréasáin.
Níor thug MCD, an comhlacht a reáchtálann an amharclann, aon trácht ar na táillí.
Dar leis an Roinn Fiontar, Trádála agus Fostaíochta, caithfidh gnólachtaí an praghas iomlán a thaispeáint go soiléir roimh an gceannach.
Tá cead acu praghsanna a athrú, ach ní mór don chustaiméir an fhaisnéis cheart a fháil roimh ré.
Tá táillí eile le feiceáil i mBaile Átha Clitah freisin – mar shampla, €1.50 sa 3Olympia Theatre (tugtar ‘cáin athchóirithe’ air sin), agus an méid céanna sa Bord Gáis Energy Theatre agus sa Gaiety Theatre.
Tá na táillí sin ar a laghad luaite ar a suíomhanna gréasáin féin.
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
