An mbeidh José Mourinho ar ais ag Manchester United?

Tá Ruben Amorim faoi chonradh ag Manchester United go dtí 2027 ach tá tuairiscí ann go bhféadfadh bord an chlub gníomhú mura dtagann trófaí abhaile Dé Céadaoin, agus go mbeidh Mourinho ag teacht ar ais

Tá caint arís faoi an ‘Special One’ José Mourinho in Old Trafford agus ceisteanna, arís, faoin mbainisteoir reatha.

Beidh cluiche ceannais an Europa League i gcoinne Tottenham Hotspur, Dé Céadaoin, ríthábhachtach do Ruben Amorim agus Manchester United – cluiche a d’fhéadfadh deireadh tobann a chur lena thréimhse i gceannas mura mbuaitear é.

Ó tháinig sé i gcomharbacht ar Erik ten Hag i mí na Samhna seo caite, tá séasúr tubaisteach tagtha ar an gclub.

Tá United sa 16ú háit sa Premier League agus tá 17 cluiche caillte acu – taifead nach bhfuil feicthe in Old Trafford le blianta fada.

Beidh an cluiche i mBilbao in éadan Spurs, atá díreach faoi bhun United sa tábla, mar chath idir beirt bhainisteoir faoi bhrú ollmhór.

Cé go bhfuil Amorim faoi chonradh go dtí 2027, tá tuairiscí ag méadú go bhféadfadh bord an chlub gníomhú mura dtagann trófaí abhaile Dé Céadaoin na seachtaine seo chugainn.

Tá ainm Jose Mourinho – iarbhainisteoir United – anois ag barr na liostaí geallchurtha mar an duine is dóchúla a ghlacfaidh leis an bpost, de réir Betfair.

Tá Mourinho faoi láthair i gceannas ar Fenerbahce sa Tuirc, ach is eol go maith gur breá leis Sasana agus tá a theaghlach fós ina gcónaí i Londain.

Bhí sé i gceannas ar United idir 2016 agus 2018 agus bhuaigh sé dhá throphai le linn an ama sin – rud nach ndearna aon bhainisteoir eile ag United ó shin.

I measc na n-iarrthóirí eile tá Kieran McKenna (9/2), Gareth Southgate (8/1) agus Xavi (17/2).

Tá Roy Keane, iar-laoch United agus captaen na hÉireann, sa rás freisin – ach le praghas fada 50/1.

Dheimhnigh Mourinho anuraidh go bhfuil suim aige fós i bpost i Sasana, cé nár luaigh sé Manchester United go sonrach.

I gcás teip eile ó Amorim, d’fhéadfadh filleadh stairiúil a bheith i ndán do Mourinho – agus do lucht leanúna United, bheadh sé sin ina ábhar conspóide agus dóchais araon.

Scéalta Gaeilge ExtraG.ie
ar fáil ar ríomhphost (email)

• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com

• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.

• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie

Cliceáil ar cheann de na lógónna chun an stáisiún teilifíse agus na stáisiúin raidió Gaeilge a fháil