Le déanaí, nochtadh gur chuir Príomh Aire Iosrael, Benjamin Netanyahu, 400km breise lena thuras go Meiriceá le haerspás thíortha áirithe a sheachaint – Éire, an Ísiltír agus an Íoslainn.
Bhí Netanyahu ag taisteal go Washington DC le bualadh le hUachtarán Mheiriceá, Donald Trump.
Thug foireann tacaíochta eitlíochta ar líne faoi deara gur ghlac an t-eitleán bealach aisteach agus fada. Ach cén fáth?
Seachnaíodh aerspás na dtrí thír sin toisc go bhfuil a gceannairí tar éis síniú a dhéanamh ar Chonradh na Róimhe – conradh a thugann cumhacht don Chúirt Choiriúil Idirnáisiúnta (ICC) gníomhú i gcoinne daoine atá cúisithe as coireanna cogaidh nó coireanna i gcoinne an chine dhaonna.
I mí na Samhna 2024, d’eisigh an ICC barántas gabhála do bheirt cheannairí Iosraelacha, Netanyahu agus Yoav Gallant, i ndiaidh fiosrúcháin.
Bhí Netanyahu ag taisteal ó Bhúdaipeist na hUngáire, áit ar dhiúltaigh rialtas na hUngáire é a ghabháil agus d’fhógair siad ina ionad sin go raibh siad ag fágáil an ICC – cé go raibh an Ungáir mar cheann de na ballstát a bhunaigh an ICC.
Cé nár féidir Netanyahu a ghabháil agus é san aer, d’fhéadfadh deacracht eitleáin nó tuirlingt éigeandála iachall a chur air leaindeáil i gceann de na tíortha sin – rud a chuirfeadh an barántas i bhfeidhm.
Mar sin, in ionad dul thar Éirinn nó an Ísiltír, thaistil an t-eitleán thar an nGréig, na hAlpa sa Fhrainc, agus ansin trasna an Aigéin Atlantaigh go Washington, áit ar tháinig siad i dtír ar an 6 Aibreán.
Seo é an dara cruinniú idir Netanyahu agus Trump ó ceapadh Trump ina Uachtarán arís. Meastar go mbeidh cúrsaí na Palaistíne agus taraifí nua ó SAM á phlé, agus tá earraí Iosraelacha buailte le taraif 17%, i gcomparáid le taraif 20% ar earraí ón Aontas Eorpach.
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
