Tá IMRAM, féile na n-ealaíon i nGaeilge a chuireann gile ar ár n-oícheanta geimhridh, linn níos luaithe i mbliana.
Agus toisc go bhfuil siad ag ceiliúradh 20 bliain de cheol, litríocht agus puipéadóireacht tá IMRAM roinnte ina dhá chuid i mbliana, agus an chéad chuid ag tosú inniu (Dé Céadaoin).
Tá clár iomlán na bliana seo seolta acu agus tá sé ar fail ANSEO.
Agus is í an cheist mhór atá ar intinn gach duine le 20 bliain anuas ná: Cad is brí le IMRAM?
Bhuel, anois tá an freagra ag Liam Carson, stiúrthóir IMRAM.
‘Nuair a shocraíos ar fhéile litríochta Gaeilge a bhunú scór bliain ó shin, ba é an file Gabriel Rosenstock a thug IMRAM ar an tionscadal mar is ar aistear taiscéalaíochta a bheimis ón lá sin ar aghaidh.
‘Ar an aistear sin, theastaigh uainn lucht féachana a thabhairt linn ar thuras liteartha ilmheánach a chuimseodh prós, filíocht, scannánaíocht agus ceol,’ a dúirt sé ag an seoladh.
Tá sí ar siúl i mBaile Átha Cliath idir an 18-21 Deireadh Fómhair agus an 10-18 Samhain i mbliana.
Agus inniu seolfar coirscéinséir nua Anna Heussaff, Sa Pholl Báite, ag Áras Scríbhneoirí na hÉireann (Irish Writers Centre), 19 Cearnóg Parnell ag 6.30in agus tá saorchead isteach.
Úrscéalaí a bhfuil an-éileamh uirthi is ea Anna Heussaff, agus is í Sa Pholl Báite – buaiteoir Duaiseanna Liteartha an Oireachtais 2022 – an ceathrú húrscéal coireachta aici i sraith a chuimsíonn Bás Tobann, Buille Marfach agus Scáil an Phríosúin.
Beidh Rabhadh gan Ghníomh/Alarmed and Inactive, ar siúl amárach (Déardaoin) i Smock Alley ag 8in, le cead isteach €20.
Pléann sé an athrú aeráide i seó a mheascann an ceol turgnamhach leis an bhfilíocht, an ealaín agus an dealbhóireacht.
Arsa Liam Carson, stiúrthóir IMRAM agus clár na féile á fhógairt aige. ‘Tá an fhís sin á ceiliúradh againn i gcónaí agus réimse leathan de nualitríocht na Gaeilge á chur os comhair an phobail againn, ón úrscéal coireachta de chuid Anna Heusaff, Sa Pholl Báite, go dtí an cuntas inspéise ar Ghaeltacht Dhún na nGall sa naoú haois déag a scríobh Cathal Póirtéir, An Tiarna George Hill agus Pobal Ghaoth Dobhair.
‘Cuimsíonn clár na bliana seo imeachtaí ilmheánacha; mórthionscadail cheoil; lainseálacha leabhar agus agallaimh le scríbhneoirí; imeachtaí do scoileanna, ina measc an comórtas haiku (Duais Bashō) agus Guth na hÉigse, comórtas aithriseoireachta do Scoileanna Iar-Bhunoideachais I gcomhar le Éigse Éireann.’
• Más mian leat ríomhphost (email) a fháil leis na scéalta is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
