Ní bheidh cead ag go leor oibrithe don Aontas Eorpach TikTok a bheith ar a ngutháin i gceann cúpla seachtain.
Sna Stáit Aontaithe tá an Coiste cumhachtach um Ghnóthaí Eachtracha sa Chomhdháil tar éis an chumhacht a thabhairt don Uachtarán Joe Biden cosc a chur ar TikTok.
Thug na polaiteoirí ansin ‘balún spiaireachta i do ghuthán’ air mar gheall ar a naisc le húdaráis na Síne.
Tá an cosc á chur i bhfeidhm san AE mar go gcreideann ceannairí go bhfuil ‘bagairtí cibearshlándála’ (cyber security’) ón gcomhlacht Síneach ar leis TikTok é.
Ciallaíonn na rialacha nua nach féidir le hoibrithe an aip comhroinnte físeáin a úsáid ar a fóin féin, má tá ríomhphoist oibre agus aipeanna oibre orthu, rud a bhíonn ag formhór na ndaoine.
Beidh tionchar ag an cosc ar oibrithe don Choimisiún Eorpach agus don Chomhairle Eorpach, comhlachtaí rialaithe an AE.
Táthar ag iarraidh orthu an TikTok aip a scriosadh láithreach ach ní mór é a bheith imithe ó gach feiste ón 15 Márta.
Úsáideann 125 milliún duine san AE TikTok.
Tá imní ar cheannairí an AE faoi chosaint sonraí, i measc imní faoi chomhlachtaí Síneacha ag spiaireacht ar institiúidí an Iarthair.
Le míonna beaga anuas, tá méadú ag teacht ar ghrinnscrúdú an Iarthair ar TikTok, atá faoi úinéireacht na cuideachta ByteDance, atá ina Síne, maidir le himní faoin méid rochtana atá ag rialtas na Síne i mBéising ar shonraí úsáideoirí.
Beidh tionchar ag an cosc ar fhoireann an Choimisiúin Eorpaigh agus na Comhairle Eorpaí, a dhéanann ionadaíocht thar ceann na mballstát uile, Éire san áireamh.
Níl cinneadh comhchosúil glactha ag Parlaimint na hEorpa go fóill. Dúirt an pharlaimint, áfach, go bhfuil ‘monatóireacht agus measúnú á dhéanamh aici ar gach sárú sonraí féideartha a bhaineann leis an aip’ agus go ndéanfadh sí measúnú ar mheastóireacht an Choimisiúin sula ndéanfaí moltaí.
Dúirt an Coimisiún go gcaithfidh a fhostaithe an aip a bhaint a luaithe is féidir agus gur cheart dóibh é sin a dhéanamh faoin 15 Márta.
Dúirt urlabhraí an AE, Sonya Gospodinova, go ndearna bord bainistíochta corparáidí an Choimisiúin, brainse feidhmiúcháin an AE, an cinneadh ar chúiseanna slándála.
‘Tá sé mar aidhm ag an mbeart an Coimisiún a chosaint ar bhagairtí cibearshlándála,’ a dúirt sí.
Dúirt urlabhraí na Comhairle Eorpaí Barend Leyts go mbeidh siad ‘ag baint an aip as ghléasanna corparáideacha agus ag iarraidh ar bhaill foirne é a bhaint ó ghléasanna soghluaiste pearsanta a bhfuil rochtain acu ar sheirbhísí corparáideacha’.
Dúirt urlabhraí do TikTok: ‘Creidimid go bhfuil an fhionraí seo míthreorach agus bunaithe ar mhíthuiscintí bunúsacha.’
I mí na Samhna, áfach, d’admhaigh TikTok go raibh roinnt ball foirne sa tSín in ann rochtain a fháil ar shonraí úsáideoirí Eorpacha.
Séanann an chuideachta, áfach, go bhfuil aon smacht nó rochtain ag rialtas na Síne ar a ábhar.
Dúirt TikTok go gcosnaíonn sé sonraí a 125 milliún úsáideoir míosúla san Aontas Eorpach agus go raibh bearta á ndéanamh aige chun slándáil sonraí a neartú.
Dúirt sé níos déanaí gur iarr sé ar cruinniú leis an gCoimisiún ‘chun an taifead a shocrú díreach’.
Dúirt an chuideachta: ‘Táimid ag leanúint ar aghaidh ag cur lenár gcur chuige maidir le slándáil sonraí, lena n-áirítear trí ionad sonraí a bhunú san Eoraip chun sonraí úsáideoirí a stóráil go háitiúil; rochtain fostaithe ar shonraí a laghdú tuilleadh agus sreafaí sonraí lasmuigh den Eoraip a íoslaghdú.’
Chuir na Stáit Aontaithe cosc ar an aip ó fheistí rialtais feidearálach, an bhliain seo caite, agus tá roinnt polaiteoirí Mheiriceá ag iarraidh cosc a chur ar TikTok ó na Stáit Aontaithe.
An mhí seo caite, tuairiscítear gur chomhairligh rialtas na hÍsiltíre d’oifigigh phoiblí a fail réidh leis an aip, maidir le hábhair imní den chineál céanna.
Bhí príomhfheidhmeannach TikTok, Shou Zi Chew, sa Bhruiséil an mhí seo caite le haghaidh cainteanna le hoifigigh an AE agus thug siad rabhadh don ardán faoi úinéireacht na Síne sábháilteacht sonraí úsáideoirí Eorpacha a chinntiú.
Gheall an chuideachta rochtain fostaithe ar shonraí a laghdú tuilleadh.
Gheall TikTok anuraidh freisin sonraí úsáideoirí na SA a choinneáil sna Stáit Aontaithe chun imní Washington a mhaolú.
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
