Tá a fhios ag mórán daoine go bhfuil Ed Sheeran i ndiaidh ceol a scríobh faoin Galway Girl agus faoina sheanmháthair, Nancy Mulligan ó Loch Garman.
Ach anois, tá rud níos doimhne á rá aige – deir sé go mbraitheann sé é féin Éireannach ‘go cultúrtha’.
Cé gur amhránaí agus scríbhneoir amhrán é Ed Sheeran as Ipswich, Sasana, tá fréamhacha Éireannacha láidre aige.
Tá sé 34 bliain d’aois anois agus tá a sheantuismitheoirí ar thaobh a athar as Éirinn.
Dúirt sé le Louis Theroux ar phodchraoladh gur chaith sé cuid mhór dá óige in Éirinn.
Tá teaghlach beag ag a mháthair – níl ann ach ise agus a tuismitheoirí. Ach ar thaobh a athar, bhí seachtar deartháir agus deirfiúr aige.
‘Bhíodh muid ag caitheamh gach saoire in Éirinn. Ba í Éire an áit a bhfuair mé mo chéad taithí ar cheol. Bhí ceol traidisiúnta le cloisteáil sa teach i gcónaí,’ a mhínigh sé.
Is as Béal Feirste a sheanathair, Bill Sheeran, agus is as Contae Loch Garman a sheanmháthair Nancy Mulligan.
Scríobh Ed amhrán faoin mbeirt acu agus tá an t-amhrán Nancy Mulligan anois ina cheann de na cinn is mó tóir uaidh.
Deir sé go bhfuil sé an-bhródúil as a chultúr agus gur mian leis é sin a chur in iúl i gcónaí.
‘Ní chiallaíonn sé, toisc gur rugadh mé i Sasana. Nach bhfuil cead agam a bheith rud éigin eile? Tá go leor daoine ar domhan a bhfuil leath nó ceathrú de chultúr eile iontu.
‘Ba chóir go mbeadh sé bunaithe ar conas a tógadh tú agus céard a bhraitheann tú i do chroí.’
Nuair a fiafraíodh de, ar an bpodchraoladh, an bhfaigheann sé ‘a lán grá’ in Éirinn, d’fhreagair sé go raibh Éire cosúil lena ‘baile eile’ i saol an cheoil.
‘Sin an áit is mó a bhfuil rath orm ó thaobh ceoil de,’ a dúirt sé.
Tá ceithre ghradam Grammy buaite ag Sheeran, agus tá a chuid albam i mbarr na gcairteacha ar fud an domhain. Tá sé pósta le Cherry Seaborn agus tá beirt iníon acu le chéile.
Ach, cosúil le go leor daoine cáiliúla, tá dúshláin ag baint leis an saol poiblí.
D’inis Sheeran scéal faoi na meáin agus a chlann do Louis Theroux.
‘Sé seachtaine tar éis do mo chéad iníon a bheith rugtha, ní rabhamar tar éis grianghraif ar bith a sheoladh chuig éinne.
‘Ach bhí páiparazzi taobh amuigh den teach agus thóg siad grianghraf di. Bhí sé san iris.
‘Bhí sé aisteach dom go raibh grianghraf d’iníon óg s’agamsa ar fhón fear nach raibh aithne agam air.’
Chuir sé béim ar an dearcadh atá ag daoine maidir le páistí daoine cáiliúla.
‘Tuigeann daoine go mbíonn tú cáiliúil agus saibhir nuair a éiríonn leat sa tionscal ceoil, ach níor roghnaigh mo pháistí an saol sin.
Níl sé ceart go nglactar leis mar ghnáthrud go dtógtar grianghraif de pháistí daoine cáiliúla,’ a dúirt sé go dáiríre.
Is léir óna chuid focal go bhfuil cos i Sasana ag Sheeran agus an ceann eile in Éirinn.
Cé gur rugadh agus tógadh é i Sasana, tá croí agus anam Éireannach aige.
Ní hamháin go bhfuil an ceol a chumann sé bunaithe ar cheol traidisiúnta agus ar scéalta a theaghlaigh, ach deir sé go mbraitheann sé go domhain go mbaineann sé le cultúr na hÉireann.
‘Níl rialacha dochta ann don chultúr,’ a deir sé.
‘Ba chóir go mbeadh sé bunaithe ar an méid a fuair tú le linn do shaoil agus ar an gcaoi a mhothaíonn tú i dtaobh do fhéiniúlachta.’
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
