Ní raibh lucht leanúna Grá ar an Trá an seó móréilimh a fháil oíche an Luain ar Virgin Media Television, agus tá an milleán á chur ar Simon Harris.
Tá na cláir choinne (dating show) ar cheann den bheagán clár as Gaeilge ar an teilifís, lasmuigh de TG4, agus tá díomá ar Ghaeilgeoirí nach mbeidh siad in ann é a fheiceáil.
Baineadh den sceideal teilifíse í go tobann agus creidtear gurb é an fáth le sin ná go bhfuil Gráinne Seoige mar láithreoir air, agus í ina hiarrthóir toghcháin d’Fhianna Fáil.
Is í an fhadhb atá ann ná go ndiúltaíonn an Taoiseach Simon Harris a rá cathain a bheidh an t-olltoghchán ann, agus dá bhfógróidh sé ceann sna seachtainí atá amach romhainn bheadh orthu stop a chur go tobann le craoladh na sraithe.
Is é sin toisc go sáródh Virgin Media treoirlínte rialála trí chead a thabhairt do Seoige, atá ag seasamh don Dáil i dtoghcheantar na Gaillimhe Thiar d’Fhianna Fáil, clár a chur i láthair le linn an fheachtais.
Bhí sé i gceist an tsraith Grá ar an Trá a chraoladh ó oíche an Luan agus a bheith ar siúl ar feadh cúig seachtaine.
Dheimhnigh urlabhraí do Virgin Media TV, ag an deireadh seachtaine, gur tógadh an seó as an sceideal.
Dúirt siad: ‘Mar gheall ar an sceideal, ní bheidh Grá ar an Trá ar an aer mar a bhí beartaithe.’
Dúirt urlabhraí do Choimisiún na Meán nach raibh siad i dteagmháil le Virgin Media faoin tsraith, ach dúirt siad go bhfuiltear ag súil go leanfadh gach craoltóir treoirlínte maidir le clúdach toghcháin.
Dúirt siad: ‘Ceanglaítear ar chraoltóirí cloí le Cóid agus Rialacha na Meán, lena n-áirítear Cód Cothroime, Oibiachtúlachta agus Neamhchlaontachta Choimisiún na Meán.
‘Ní féidir le hábhar craolta rudaí a léiriú i bhfabhar, nó i gcoinne, aon leasa toghcháin, lena n-áirítear páirtithe nó iarrthóirí.’
Is féidir le Virgin Media an tsraith a thaispeáint, a taifeadadh cheana féin, tar éis an toghcháin, gan aon treoirlínte a shárú.
Dhiúltaigh urlabhraí do Virgin Media a rá an deireadh seachtaine seo cén uair a chraolfaí an tsraith.
Tá an sliotán le haghaidh oíche amárach líonta anois le sraith nua de Living with Lucy a bhí le craoladh ar dháta eile.
Ar Grá ar an Trá, thar thréimhse chúig seachtaine, tagann 12 dhuine shingil le chéile agus iad ag súil le grá a aimsiú, agus iad ag tabhairt faoi dhúshláin feabhas a chur ar a gcuid Gaeilge mar lánúin.
Tugann an lánúin bhuaiteach €10,000 abhaile.
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
