Tá Caroline Seoighe, an cruthaitheoir ábhair faisin, áilleachta agus stíl mhaireachtála a rugadh i nGaillimh agus atá lonnaithe i nDubai anois, ar tí a sraith féin ar TG4 a chur i láthair.
Ó seoladh a hardán in 2020, tá lucht féachana dílis agus gafa aimsithe ag Caroline a thagann chuici le haghaidh leideanna maidir le stíl, áilleacht agus taisteal, go háirithe i measc Éireannach atá ina gcónaí in Aontas na nÉimíríochtaí Arabacha.
Agus le linn a sraith sé pháirt ar TG4, Gaeil an Fhásaigh, beidh sí ag comhrá le hÉireannaigh eile atá ina gcónaí san ‘fhásach’ faoina saolta suimiúla.
Caroline, tá tú i do mhúinteoir, i do chruthaitheoir meán sóisialta agus anois i do láithreoir TG4 i Dubai. Conas a tharla an turas seo ar fad?
Sea, is turas sách neamhghnách é. Ach, tháinig gach rud le chéile go nádúrtha. Bhog mé ó Chonamara i nGaillimh go Dubai mar mhúinteoir Gnó ar dtús.
Cheap mé gur bliain amháin a bheadh ann, ach mar is minic a tharlaíonn sé, d’fhan mé agus d’oscail sé saol úrnua dom.
Thosaigh mé ag roinnt mo shaoil agus mo bhogadh thar lear ar na meáin shóisialta, an faisean, an taisteal agus an saol sa bhfásach, agus chruthaigh mé pobal dochreidte timpeall orm dá bharr.
Thosaigh brandaí, go háirithe brandaí Éireannacha, ag obair liom agus mé ag cur a gcuid táirgí chun cinn i margadh Dubai.
Thug an obair sin muinín dom a bheith os comhair an cheamara agus tháinig an chruthaitheacht chun tosaigh ionam. Bhí an Ghaeilge liom ón mbaile i gcónaí agus nuair a tháinig TG4 i dteagmháil liom faoi shraith nua a thaispeánfadh saol na nÉireannach anseo, mhothaigh sé mar chéim nádúrtha, rud a bhí i gceist ó thús.
Tá mo shaol mar mhúinteoir, mar chruthaitheoir ábhair agus mar dhuine a bhfuil grá aici don teanga ag teacht le chéile sa tionscadal seo.
Inis dúinn faoi Gaeil an Fhásaigh. Cad é an clár agus cad é do ról ann, Caroline?
Is sraith sé chuid é a thugann léargas ar na hÉireannaigh atá ag cruthú saol úrnua anseo sa bhfásach. Téim timpeall Dubai agus Abu Dhabi ag bualadh le múinteoirí, lucht gnó, lúthchleasaithe agus taidhleoirí.
Bím ag caint freisin le daoine a tháinig anseo le plean bliana agus atá fós anseo fiche nó fiú tríocha bliain ina dhiaidh. Mo ról ná a gcuid scéalta a thabhairt chun solais agus an méid atá bainte amach acu a cheiliúradh. Déanaim é trí Ghaeilge agus tá sé sin fíorspeisialta dom.
Cár fhoghlaim tú an Ghaeilge agus cad is brí léi duit?
Is í an Gaeilge an teanga inar tógadh mé. Is teanga an bhaile, teanga mo thuismitheoirí agus mo phobail í. Ní hamháin gur teanga í, ach nasc le mo chuid fréamhacha agus le m’fhéiniúlacht. Tá sé álainn í a úsáid anois i gcroílár an fhásaigh, mílte míle ó bhaile.
Tá tú an-ghníomhach ar na meáin shóisialta agus tá grá agat don fhaisean, Caroline. Conas a théann
sin le do shaol anseo?
Is aoibhinn liom an faisean agus an áilleacht agus níl aon easpa stíle anseo i Dubai. Níor shíl mé riamh go mbeinn ag obair ar líne chomh maith, ach tháinig gach rud chun cinn go nádúrtha nuair a thosaigh mé ag roinnt mo shaoil anseo i Dubai.
Thaitin an mhacántacht sin le daoine agus thóg sé pobal álainn timpeall orm. Tá an t-ádh liom an deis a bheith agam oibriú le brandaí Éireannacha i Dubai.
Tugann sé nasc baile dom agus mothaím go bhfuilim ag cur rud éigin dearfach chun cinn thar lear. Sílim gur tháinig an faisean, an t-ábhar ar líne agus an láithreoireacht le chéile dom ar bhealach nádúrtha.
Cabhraíonn siad lena chéile agus tugann siad muinín, stíl agus beagán spraoi dom os comhair an cheamara.
Cad é an rud is mó a thaitníonn leat faoi shaol i Dubai?
An fuinneamh! Tá an saol gasta ach spreagúil. Agus cé go bhfuil mé i bhfad ó Chonamara, tá pobal Éireannach láidir anseo a thugann mothú baile dom.
Ach, fiú leis an gcraic agus an aimsir anseo, ní féidir aon rud a chur i gcomparáid leis an mbaile. Airím uaim mo mhuintir, an ghaoth fhionnuar agus fiú an cupán tae ceart. Tá Dubai iontach, ach ní bhíonn aon áit mar an baile.
Ag breathnú chun cinn, cad iad na haidhmeanna atá agat? Ar mhaith leat níos mó a dhéanamh sna meáin?
Ba mhaith liom leanúint leis an láithreoireacht agus níos mó a dhéanamh sa mheán Ghaeilge.
Is breá liom an smaoineamh go bhféadfainn nasc a chruthú idir Éireannaigh sa bhaile agus Éireannaigh thar lear. Is céim nua é dom agus níl a fhios agam cá rachaidh sé, ach táim ag súil leis agus táim fíorbhuíoch as an deis.
Craolfar Gaeil an Fhásaigh, á chur i láthair ag Caroline Seoighe, ar TG4 an bhliain seo chugainn
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
