Bheadh sé deacair Kayleigh Trappe a sheachaint dá mbeadh duine ag iarraidh é sin a dhéanamh. Is ‘feiniméan TikTok’ í agus beidh aithne ag formhór na ndaoine uirthi as a cuid léirithe suntasacha ar Dancing with the Stars.
Tá sí paiseanta faoin nGaeilge freisin. Fuair sí oideachas i scoil Bhéarla ach thit sí i ngrá leis an nGaeilge.
Dá bhrí sin, is cosúil gurb í an duine is fearr chun taisteal na tíre agus labhairt le daoine atá ag foghlaim scileanna éagsúla, ach atá á dhéanamh trí mheán na Gaeilge.
In Eachtraí Foghlama le Kayleigh Trappe, atá ar TG4 Dé Luain ag 7.30pm, beidh cur síos ar chomh tábhachtach is atá sé fáilte a chur roimh dhaltaí nach bhfuil aon Ghaeilge acu nó nár fhreastail ar Ghaelscoil riamh, mar í féin.
Agus is meascán iontach éagsúil de dhaoine atá ann.
Rachaidh sí go Baile Átha Cliath, Ciarraí, Conamara agus Inis Oírr chun casadh le grúpa éagsúil foghlaimeoirí, atá ar thuras foghlama trí Ghaeilge.
Beidh sí ag caint le himreoir fichille Meicsiceach-Veiniséalach, dochtúir óg as an mBanglaidéis, ceardaí bád as Conamara agus cailín as Loch Garman a rinne turas 300km chun freastal ar scoil.
Agus tá scéal ar leith ag gach duine acu.
Mar shampla bainfidh sí triail as an tsaoirseacht bád le Páraic Ó hEidhin, a mholann d’fhoghlaimeoirí, ‘Déan cinnte go bhfíoraíonn tú d’aislingí féin seachas aislingí daoine eile.’
Chinn Páraic, a raibh na pointí aige chun freastal ar an gcoláiste nuair a chríochnaigh sé an scoil, printíseacht a dhéanamh toisc go raibh sé ag iarraidh a bheith ag obair lena lámha.
Roinnfidh sé an chomhairle a thugann sé dá pháistí féin: ‘Cibé rud a shocraíonn tú a dhéanamh sa saol, déan cinnte gur rud é a thaitníonn leat.
‘Mura bhfuil aoibh gháire agat ar d’aghaidh agus tú ag obair, is dócha nach bhfuil tú sa phost ceart… Déan cinnte go bhfíoraíonn tú d’aislingí féin seachas aislingí daoine eile.’
Dúirt sí go raibh seachtain iontach aici.
‘Bhuail mé le daoine éagsúla ar fud na tíre agus bhí a gcuid scéalta iontacha féin ag gach duine acu.
‘Tá dearcadh dearfach acu ar fad i leith na Gaeilge.’
Cuirfidh sí tús lena cuid eachtraí le cuairt ar a seanscoil i Muineachán, Coláiste Oiriall, áit a gcloisfidh sí faoi chomh tábhachtach is atá sé fáilte a chur roimh dhaltaí nach bhfuil aon Ghaeilge acu nó nár fhreastail ar Ghaelscoil riamh, ar nós Kayleigh.
Rachaidh sí go Leamhcán i mBaile Átha Cliath chun bualadh leis an gcódóir díograiseach, Samuele Arzate Montalti, i gColáiste Cois Life, arb as Veiniséala a mháthair agus arb as Meicsiceo a athair. Agus imreoidh ficheall leis.
Deir Samuele go raibh an fhoireann agus na scoláirí ‘an-fhoighneach’ leis. Le linn dóibh a bheith ag imirt fichille gheobhaidh Sam amach go ndeachaigh Kayleigh agus é féin chuig an gcoláiste samhraidh céanna.
Rachaidh sí go Gaelcholáiste Chiarraí freisin chun bualadh le Hridita Rahm, scoláire atá sa 5ú bliain agus foghlaimeoidh sí cróiseáil léi.
Roinnfidh Hridita a cultúr léi, cultúr na hÁise Theas. Tá Hridita ag iarraidh staidéar a dhéanamh ar leigheas nuair a bheidh an scoil críochnaithe aici agus is maith léi go dtugann a scoil ‘aird ar chultúr agus is breá léi a bheith ag breathnú ar chultúir nua’.
Cailín a d’fhíoraigh a haisling féin í Éadaoin Kinsella O’Neill, agus buailfidh Kayleigh léi ar Inis Oírr, an stad deireanach ar a turas.
Rinne Éadaoin an turas 300km ó Loch Garman le bheith ag staidéar don ardteistiméireacht i gColáiste Ghobnait tar éis di ‘titim i ngrá leis an áit, leis an teanga agus leis na daoine’ ar thuras idirbhliana Gaeltachta.
Shocraigh sí ansin freisin ar athrú mór eile, a cuid ábhar a dhéanamh trí Ghaeilge.
Is breá léi an tsaoirse agus an neamhspleáchas a bhaineann leis an saol ar an oileán.
‘Is féidir liom dul áit ar bith, am ar bith, agus tá sé sin go hiontach,’ a deir sí.
Is iad na Boird Oideachais agus Oiliúna is mó a chuireann oideachas trí Ghaeilge ar fáil ag an dara leibhéal agus cuireann siad breisoideachas agus oiliúint ar fáil gach bliain do bhreis agus ceathrú milliún duine de gach aois ar mian leo athoiliúint nó uasoiliúint a dhéanamh.
Craolfar Eachtraí Foghlama le Kayleigh Trappe ag 7.30pm Dé Luain ar TG4.
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
