Chuir Rachael Blackmore, réalta na rásaíochta capall, iontas ar lucht leanúna an spóirt tar éis di a fhógairt go bhfuil sí ag éirí as go tobann.
Ag 35 bliain d’aois, tá deireadh curtha aici lena gairm mhór le rá tar éis 16 bliana.
Bhain an bhean as Tiobraid Árann buaicphointí stairiúla amach – Corn Órga Cheltenham, an Champion Hurdle, agus, go háirithe, an Grand National i 2021 ar Minella Times, ag marcaíocht do Henry de Bromhead.
D’éirigh léi Gradam Pearsa Spóirt na Bliana an BBC agus RTÉ a bhaint amach an bhliain chéanna.
Dúirt Blackmore go raibh brón uirthi go raibh sí ag imeacht, ach go mbraith sí go bhfuil an t-am ceart tagtha.
‘Tá mo laethanta mar mharcach tagtha chun deiridh. Tá mé fíorbhuíoch as gach rud atá tarlaithe le 16 bliana anuas. Ní raibh mé ag tnúth leis an rath a bhí agam,’ a dúirt sí.
Thosaigh Blackmore ag marcaíocht le Club Capaillíní Thiobraid Árann, áit ar cheannaigh a tuismitheoirí, Eimir agus Charles, capall gasta darb ainm Bubbles di.
‘Sin a chuir tús le mo ghrá don rásaíocht,’ a dúirt sí.
Ghabh sí buíochas lena páirtí, an marcach Brian Hayes, as a thacaíocht leanúnach, agus le tiarnaí capall agus traenálaithe éagsúla a chreid inti – go háirithe Shark Hanlon, a thug seans di go luath ina saol proifisiúnta.
‘Beidh mé buíoch go deo le Shark as a chreideamh ionam nuair a bheadh sé níos éasca duine eile a roghnú,’ a dúirt sí.
Luaigh Blackmore freisin an tionchar ollmhór a bhí ag Henry de Bromhead ar a cuid éachtaí.
‘Is traenálaí eisceachtúil é Henry. Thug sé misneach dom agus thug sé na laethanta is fearr de mo shaol dom,’ a dúirt sí.
I measc na dtráchtanna a fuair sí, dúirt Jane Mangan ó RTÉ: ‘Níor bhris Rachael Blackmore ach síleálacha gloine – phéinteáil sí an spéir ar fad.’
Níor nocht sí fós céard atá i ndán dá saol amach anseo, ach foilsíodh a céad leabhar do pháistí, Granny National, le déanaí.
Mar sin, b’fhéidir go mbeidh scéalta móra fós le scríobh ag Rachael Blackmore – cé nach mbeidh sí ar an diallait níos mó.
Tá tuairimíocht faoi cad a d’fhéadfadh sí a dhéanamh anois, agus tá go leor ag smaoineamh go bhféadfadh sí a bheith le feiceáil ar Dancing with the Stars ar RTÉ.
Deir geallghlacadóirí Ladbrokes go bhfuil seans láidir ann go ndéanfaidh Rachael an síoda a mhalartú do na sequins agus dúirt urlabhraí Alex Apati go mbeadh ‘iontas’ orthu mura ndéanfadh ceannairí DWTS iarracht Rachael a fháil.
• Más mian leat ríomhphost (email) a fháil leis na scéalta Gaeilge is fearr ar ExtraG.ie, ó Luan go hAoine, seol an focal ‘Tá’ chuig joeextragdotie@gmail.com
• Más mian leat tuilleadh eolais a fháil faoi conas do chuid Gaeilge a fheabhsú is féidir dul chuig Conradh na Gaeilge agus Foras na Gaeilge.
• Tá athbheochan na Gaeilge ar siúl faoi láthair, ar mhaith leat páirt a ghlacadh. Léigh beagán Gaeilge gach lá ar Extrag.ie
Bí ar an gcéad duine a léann an Nuacht is déanaí i nGaeilge, leis an gclúdach is fearr ar chúrsaí reatha, Siamsaíocht bhríomhar agus Spórt.
